ILRF 1875 lalet turin Supreme Court-ah kal tum

Zofa Welfare Organisation (ZWO) leh Joint Action Committee on Inner Line Reserved Forest Demand hruaitute chuan nimin khan Aizawl Press Club-ah thuthar thehdarhtute an kawm a; sq. km 509 a zau Inner Line Reserved Forest 1875 chu Mizoram chhunga dah a nih theih nan Supreme Court-ah kal an tum thu an sawi.

ZWO leh JAC hruaitute chuan, ILRF 1875 chu laklet a nih theih nan Mizo mipui an ṭanrual a ṭul thu a sawi a, "A hmun hi Cachar district chhim lamah chiah a awm a, he sq.km 509 hi chiang lehzualin an lantir lehna chu Form No. 46, Forest department, Assam - area of Reserved and Unclassed Forest, 1896-97, column 'Civil District or Territory' hnuah 'Lushai Territory' tih zawm pheiah khan acres -5,75,760 or equivalent in square mile 509 tih a chuang a ni," an ti.

ILRF 1875 lalet turin Supreme Court-ah kal an tum thu sawiin ZWO leh JAC hruaitute chuan, "Mizo mipui zawng zawngin theihtawp kan chhuah angai a, Supreme Court kal tur hian pawisa tam tak a ngaih avangin tam lua leh tlem lua awm loa sum thawhkhawm turin kan sawm bawk a ni," an ti a; SBI Kulikawn Branch, Aizawlah ZWO bank account number - 41709681296 (IFSC : SBIN0017398)-ah sum thawh dun tan thawh theih reng a nih thu an sawi.