Mizoram sorkarin Jeremy-a inhmun a pe

Mizoram sorkar chuan weighlifter Jeremy Lalrinnunga inhmun (LSC) a pe a, LSC hi nimin khan Sports minister Robert Romawia Royte-in a pisa-ah Jeremy nu leh pate hnenah a hlan.

Robert Romawia chuan Jeremy Lalrinnunga hnena LSC hlan tur hi thutlukna awm tawh, bawhzui ngai awm nual a nih thu a sawi a, "Sports leh Revenue department leh sorkar hotute hmalakna avanga hlan theiha a awm ta hi a lawmawm hle. Dan pangngaiin sorkar tan hian mimal hnena ram pek hi thil harsa tak mai ni mah se, Council of Ministers hial ṭhukhawma lungrual taka Jeremy Lalrinnunga hi inhmun pek a ni," a ti.

Ainawn Veng local council-in Jeremy-a tana ṭan an lakna te chu fakawm a tih thu leh Ainawn veng bialtu MLA Zothantluanga leh councillor-te ṭan lakna chhuanawm a tih thu sawiin Minister chuan, "Infiammite tan Mizoramah hmasawnna a awm chho zel a, tunah phei chuan Olympic leh khawvel huapa medal an la a nih pawhin lawmman pek dan tur sorkarin felfai takin dan a duang tawh," a ti a, Jeremy Lalrinnunga chu Olympic thlenga lawmman dawng turin duhsakna a hlan nghal.

Jeremy Lalneihtluanga chuan Jeremy-a nen tunhnaiah an inbiak thu leh medal a dawn chu a bul ṭanna chauh a ni tih a lo hrilh thu a sawi.