Governor hoin beng dar chungchang sawiho a ni; Mizoramah beng dar mamawh 100 chuang an awm

Governor Dr Hari Babu Kambhampati hmalaknain nimin khan Raj Bhavan-ah Deen Dayal Sravana Foundation (DDSF), Health department leh Social Welfare & Tribal Affairs department hotute'n thawhho dan tur an sawiho a; Mizoramah bengdar mamawh mi 100 chuang an awm tih tarlan a ni.

Governor Dr Hari Babu Kambhampati chuan, Mizoramah beng lama harsatna nei tam tak an awm mek thu a sawi a, "Heng mi vanduai, ṭanpui ngaite hian a thlawna beng dar an neih theihna turin DDSF-te hi an inhuam a, Mizoram Health department leh SWTA department-ten beng dar vuah mamawhtu zawn chhuah kawngah an puih erawh a ngai," a ti a, he thawhhona hi harsatna a awm loh chuan a ranglama kalpui nghal theih a nih thu a sawi.

A thawhkhatna atan zirlai (KG - College) te ngaih pawimawh a nih thu sawiin Larsap chuan, "Chhinchhiah bik ni se a ṭha. Beng lama harsatna nei, screening hmachhawn ngai, hearing aid mamawhte pawhin State Nodal Officer, NPPCD hnenah in hriattir se," a ti.

DDSF hotute chuan beng dar vuah ngaite zawn chhuah kawngah Mizoram sorkarin statistics mumul tak a neihsa chuan, hun rei lo teah hna an rawn thawk ṭan thei tih an sawi a, Mizoram sokar lam aṭanga lehkha pawimawh an mamawhte chu screening report, aadhaar leh ration card a nih thu te, a thawh khatnaah zirlaite ngaih pawimawh hmasak an duh thu te, tuna Mizorama beng ṭha lo chhinchhiahte bakah, district level-ahte pawh screening neih chhunzawm ni se ṭha an tih thute an sawi bawk.

Mizoram sorkar aiawhte chuan a thlawna beng dar dawng duh leh mamawh Mizoramah tam tak an awm mek tih an sawi a, "District tinah deuh thawh audiologist leh audiometric assistant-te an awm a, screening pawh kalpui ṭhin niin tunah hian mi 100 chuang hearing aid mamawh an awm mek," an ti a, tuna an chhinchhiah zat aiin beng dar mamawh an tam thu leh screening pawh a hranpaa camp buatsaiha neih theih a nih thu an sawi a ni.