AH & Vety hotute'n ASF vanga vawk thihna khuate an tlawh

AH & Vety department hotute chuan nimin khan tunhnaia vawk pul hri African Swine Fever (ASF) avanga vawk eng emaw zat thihna Champhai district chhunga Ngur leh Zote khuate an tlawh a, vawk natna ASF hrileng avanga ranvulhtute harsatna tawh dante zirchiangin an enfiah a, hrileng darh zel loh nana hmalak zel dan tur inzirtirna hun an hmang nghal.

Chawhma lamah Zote-ah hun hman niin chawhnu lamah Ngur-ah hun hman a ni thung. ASF Awareness Campaign neih nghal niin, vawk thi sawngbawl dan leh inven zel dan tur te, ASF hmundanga a darh zel lohna tura hmalak ho zel dan turte zira inrawnkhawmna neih a ni.

Inrawnkhawmna leh inzirtirna hun buatsaih hi Champhai DVO Dr B Lallawmsanga'n kaihruaiin, AH & Vety jt. director Dr Lalrinawma'n Mizoram chhunga vawkte'n natna hri an kai tawh dan leh vawkvulhtute tawrhna tawh dante a tarlang.

AH & Vety dy. director (Disease Investigation & Epidemiology) Dr M Zohmingthangi chuan ASF chungchanga hriattur pawimawhte leh invenna chungchangte a lem nen vawk vulhtute a hrilhfiah.

Zirhona neih zawh hnu hian sawihona hunneih chhunzawm niin, he hunah hian vawkvulhtute bakah VC leh NGO-te an tel.