KHAWTHLIR

Pawisa lem man

CID (Special Branch) te chuan May 16, Thawhlehni zan khan an thudawn bawhzuiin pawisa lem cheng nuai 25.20 hu chu Lalṭanpuii (42) d/o HN Kaia, Vairengte Kawngthar Veng leh Lallungmuana (40) s/o Mankunga (L), N Vanlaiphai Rawlkhang Veng nia inchhalte kut aṭangin Vairengte-ah an man. Pawisa lem man te hi Rs 2,000 tlang hlir 1,007 leh Rs 500 tlang hlir 1,012 a ni.

HSLC pass lawm

Govt. Kolasib High School chuan nimin khan MBSE buatisah HSLC Examination 2023 result chhuakah an zirlaite an pass vek lawmna hun an hmang a, bialtu MLA K Lalrinliana, minister-in a hmanpui. Minister chuan zirlaite chu khawtlang tana mi ṭangkai leh chhawrtlak ni zel turin a chah a, "Hna leh eizawnna dap kawngahte mahni hnam ṭawng bakah Hindi thiam ngaih pawimawh a ṭul," a ti.

District Games huaihawt dawn

Aizawl District Sports Committee (2023-2024) chu nimin khan an chairman Dr Lalhriatzuali Ralte, district bawrhsap hoin a pisaah an ṭhu a; Aizawl District Sports Committee inkaihhruaina dan duan thar thlirhoin, siamṭhat ngaite an sawiho a; kumin chhunga an hmalak dan tur an rel zingah Aizawl District Games huaihawtte a tel.

Buarpuiah Free Clinic

Agriculture minister C Lalrinsanga chuan nimin khan a bial chhunga Buarpui PHC-ah a thlawna inentirna free clinic a buatsaih a, Buarpui leh a chhehvel khua aṭangin damlo 300 vel hriselna dinhmun endik a ni. Free clinic-ah hian medicine, naupang leh hmeichhe doctor-te'n damlote hriselna dinhmun an endik a, khaw hmu ṭha lo tan mit entirna siam a ni bawk.

Silai licence

Lunglei district magistrate Ramdinliani chuan Lunglei district-a silai licence nei zinga silai pahnih aia tam lei/ kawl/ neite chu May 31, 2023 ral hmaa an chhungkaw member-te hminga transfer turin a hriattir a; hun tiam chhunga DC pisaa transfer dilna thehlut lote chu an silai chhuhsaka, an license tihtawp sak an nih tur thu a tarlang.