Hmasawnna hnathawh hrang hrangte a huam chhung YMA-in an vil dawn

YMA Rorel Inkhawm vawi 3-na October 27, 2022-a Thing­sulthliah khelmual, Zawlbuk Group YMA-a neihin a rel, 'Eirukna leh hlemhletna a reh theih nan Central YMA-in tun aia chak zawkin hma la rawh se' tih bawhzuina atan hma­sawnna hnathawh hrang hrangte hnathawhna huam chhunga YMA-ten an vil dawn.

CYMA chuan YMA Rorel Inkhawma an thurel bawhzuina atan hian tunhnai khan an hnuaia sub. hqrs. YMA, group YMA leh branch YMA-te tih tur a ruahman.

Sub. hqrs. YMA, group YMA leh branch YMA-te chu an huam chhunga hmasawnna hnathawh hrang hrangah sum sanction leh hnathawh inmil lo, hnathawh chhia leh rinhlelhawm a awm a nih chuan CYMA hnenah thlen tura hriattir an ni. Hemi chungchangah hian CYMA chuan May 17, Nilaini khan lehkha a thawn chhuak.

CYMA chuan sub. hqrs. YMA, group YMA leh branch YMA-ten thuthehluh an neih chuan zirchiangin, a ṭul angin a bawhzui dawn a ni.

Hmasawnna hnathawh hrang hrang endik chu ram leh hnam tana thil pawimawh tak a nih thu tarlangin CYMA chuan, "Mahni huamchhung ṭheuh uluk taka zirchiangin, hmalak zui ngai nia kan hriatte CYMA-a thlen turin kan in ngen e," tiin sub. hqrs. YMA, group YMA leh branch YMA-te an ngen.

Hei bakah hian YMA Rorel thurel bawhzuina atan hian CYMA chuan Mizoram sorkar hnenah Lokayukta ti chak tur te, Lokayukta-ah investigation team din turte leh CBI koh luh a ṭul a nih chuan remti ṭhin turtein an ngen dawn a ni.