Sorkar ṭha siam lo tur tan chuan sorkarna siam tum chi a ni lo - MPCC President

Aizawl South-II Block Congress chuan nimin khan Thakthing Veng YMA Zawlbukah meeting an nei a, an hun hmanpuitu MPCC president Lalsawta chuan sorkar ṭha siam lo tur tan sorkarna siam tum chi a nih loh thu a sawi.

MPCC President chuan nakinah tu leh faten thin­rima an chhuah­­chhal lohna turin vawiinah hian ram tana thil ṭha tih leh ngaih­tuahna dik put chu a chhânna a nih thu sawiin, "Chhuan­lam engmah kan nei thiang lo. Mi ram leh hnamin min tih sak dawn lo, keimahni hi mawhphurtu kan ni," a ti.

Sorkar ṭha siam lo tur tan sorkar tum chi a ni lo tih sawiin Lalsawta chuan, "Hun a tlem lutuk tawh. Dawihzep leh hlauh nei chunga kal mai mai hman kan ni lo, a dik lo chu a dik lo, a ṭha lo chu a ṭha lo, a ṭha chu a ṭha, a dik chu a dik tlang tur a ni," a ti a, an party chuan kal tumna leh pet goal-na tur lam an hriat thu a sawi.

Lalsawta chuan an party-ah mi thar an lut dawn nia sawiin, "Mi ṭha, mi rinawm, Mizoram mipuiin an pawm, politics bawhfuh tum lo leh tih fuh tum lo, Mizoram tana sorkar ṭha siam tur Congress-ah an lo kal dawn. Anmahni ang mi huaisen leh mi dik hi Mizoram leh Congress party-in kan mamawh," a ti.

Thusawitu dang MPCC treasurer Dr Lalmalsawma Nghaka chuan, sorkar hrim hrim tuma rem leh rem loa mipui thu dik lo leh tih theih loh tur hrilha sorkar ngawr ngawr chu Congress party tum a nih ve loh thu a sawi.

Huaisen taka thawhrimna nena bulṭan turin Mizoram mipui an duh tih sawiin MPCC Treasurer chuan, "Mi taima leh thawkrimte dinchhuahna ram, mi taima chenna ram kan nih theihna turin Ṭang Puihna kan kal pui dawn. Huaisen takin kan kal dawn. Dik lo leh fel lo takin a huaisen theih loh," a ti.(Phek 2-ah zawm a ni)