Larsapin MZU-ah arsi leh vansang zirhona a hawng

Mizoram University (MZU)-a Department of Physics leh Mizoram Science Centre-te ṭangkawp chuan nimin khan MZU-ah ni hnih awh tur - International Symposium on the History of Astronomy of the Mizo People' an buatsaih a, Governor Dr Hari Babu Kambhampati, MZU chief rector ni bawkin a hawng.

Governor Dr Hari Babu Kambhampati chuan, arsite chanchin hian mihringte nunah hmun lairil tak an luah tih a sawi a, "India ram mite ngei pawh hian mithiam Aryabhatta hun aṭang tawhin thûk takin an nun nen inzawmna neiin an lo ngai tawh ṭhin a, Mizo pi leh puten arsi an lo hriat dante vawnhim a nih theih nana hmalatu MZU Physics Dept. leh Mizoram Science Centre-te an fakawm hle," a ti a, science centre chu theihtawp chhuaha ṭan la chhunzawm zel turin a chah.

Ṭhangtharte zingah arsi chanchin leh van thengreng chanchin zir châkna tuh tura hmalak a pawimawh thu sawiin Larsap chhuan, "Tunlai ṭhangtharte chu digital media leh internet hmangin thil thar chi hrang hrangin an nun a deng mek a, hetihlai hian mahni hnambil ziarang leh pawm dante vawnṭhata hlanchhâwn a nih zel theihna turin upa zawkte leh zirtirtuten mawh an phur a, ṭan an lak a ngai," a ti.

Hawnna inkhawm hi MZU Physics Department HoD Prof. Zaithanzauva Pachuauin a kaihruai a; Australia-a Hive Planetarium principal astronomer Dr Martin George, MZU acting vice chancellor Prof. Pravakar Rath, SPS dean Prof. Diwakar Tiwari leh DST CSO H Lalsawmlianaten thu an sawi bawk a ni.

Symposium-ah hian Mizoram chhung leh pawn aṭangin mithiam thlan bikten technical session vawi li an nei dawn a, thupui zirna leh sawihona hun neih tur niin; vawiinah Mizoram Science Centre, Berawtlangah chhunzawm a ni ang.