North Lunglengah Herbal Garden din tum a ni - Health Minister

Nimina New Delhi-a National AYUSH Mission Conclave buatsaihah Health & Family Welfare minister Dr R Lalthangliana a tel a, Mizorama ramhmul damdawite zirchiana tihchangtlun a nih theih nan North Lunglengah Herbal Garden din tum a nih thu a sawi.

Dr R Lalthangliana chuan, Mizoram State Medicinal Plants Board-in National AYUSH Mission hnuaiah society pakua, chhungkaw 270 awmna chuan hlawhtling taka hma an lak thu a sawi a, "Mizorama ramhmul damdawite zirchiana tihchangtlun a nih theih nan North Lunglengah Herbal Garden din tum a ni," a ti a; kum 2020-2021 aṭanga National AYUSH Mission hnuaia medicinal plants telh a ni lo chu pawi a tih thu sawiin, telh leh ngei turin sorkar laipuia thuneitute a ngen.

Mizoramah AYUSH doctor mamawh belhna a nasat thu sawiin Health Minister chuan, mipuite'n AYUSH damdawi an hman ṭangkaia an hriatchian theihna tura rawtna a thlen a; khum 50 awmna AYUSH Hospital leh khum 10 awmna AYUSH Hospital dinna tur atana Union AYUSH minister Sonowal-a'n Mizorama lungphuma rawn phum tawh hote a rang lama thawh a nih theih nan pawisa pechhuak turin a ngen nghal.

Dr R Lalthangliana chuan AYUSH damdawi daihzai zawka mipuite'n an hmuh theih nan AYUSH Ministry in an lo sawihmuh tawhna hmun hrang hrang - Khawhri leh Muallianpui (Hnahthial district), Zawlpui (Lunglei district), Silsuri (Mamit district), Sangau (Lawngtlai district), Lopu (Siaha diatrict), Zokhawthar (Champhai district), Lungdai (Kolasib district)-ahte dah a nih theih nan ruahmanna siam mek a nih thu a sawi bawk a ni.