Champhai district bank-te CD Ratio 66.68%

Champhai District Consultative Committee (DCC) chu nimin khan an chairman James Lalrinchhana, bawrhsap kaihhruaiin DC conference hall-ah an ṭhukhawm a; January - March 2023 chhunga Champhai district bank hrang hranga pawisa dahluh leh pekchhuah zat inthlauh dan khaikhinna, credit deposit (CD) ratio chawhrual chu 66.68% a nih thu tarlan a ni.

James Lalrinchhana chuan, mipuite'n bank nihphung leh chhawr ṭangkai dan an thiam loh chuan banking system kalpuiin awmzia a neih loh thu leh a tum a hlawhtlin theih loh thu a sawi a, "Financial Literacy Campaign (FLC) kaltlanga mipuite bank kalphung leh chhawr ṭangkai dan nasa zawka kalpui a ṭul," a ti a, FLC hi mipui leh banker-te inzawmna ṭha zawk siamtu, sum neih angte ṭangkai zawk leh hamṭhatna awm angte an dawn theih nana inkawh hmuhna hmanraw pawimawh tak a nih thu a sawi.

Lead district officer (LDO) Siddharaj, RBI Aizawl manager nibawk chuan, FLC neih hunah scheme pawimawhte sawifiah mai duh tawk loa mipuite'n a taka scheme an chhawr ṭangkai theih nana lehkha bawhzui ṭulte leh hnathawhna hmanruate kenga, tih sak nghal zel turin a chah a, "Buai tak tak ni mah ula, hun awl remchang in neihte mipuite hnena bank chungchang hriattur pawimawh zirtir nan hmang ṭhin ang che u," a ti.

Ṭhutkhawmah hian Tuipui khuaa banking service tihchangtlun dan tur an sawiho a, hemi kaltlanga Business Correspondent (BC) dah a nih theih nan hmalak ni se, an ti. Bank-in sum a kawl theih zat Currency Management - Remittance leh security chungchangte sawiho niin, bank chungchang hriatzau nan district level-a RBI quiz bulṭan a nih thute tarlan a ni bawk.

Champhai district-ah hian bank branch hrang hrang 18 a awm a - public sector bank panga, private sector bank panga, regional rural bank pasarih leh state cooperative bank pakhat bakah, ATM pakua, Business Correspondent 10, CSP pakhat leh IPPB hnuaiah Banking Touch Point 21, Financial Literacy Centre pahnihte a awm a; Champhaiah hian Rural Self Employment Training Institution (RSETI) hranpa a awm loh avangin RSETI, Aizawlin a vil a ni.

Champhai district bank-te hmalak dan

■ January - March 2023 chhungin Champhai district-a bank-te CD ratio chu 66.68% a ni a, October - December 2022 CD ratio (74.56%) aiin 7.88% in a hniam. CD ratio ṭha ni tura a hniam lam bituk zat chu 60% a ni.

■ January - March chhung khan bank-ah cheng nuai 52399.23 dahluh a nih laiin, bank-in pawisa a pekchhuah zat hi cheng nuai 34942.40 a ni.

■ Sorkar kum 2022-2023 chhungin Priority Sector atana target 10,213 (cheng nuai 21446.75) aṭangin 6,168 (cheng nuai 10171.16) tih hlawhtlin (47.42%) a ni.

■ Non Priority Sector hnuaia target 159 (cheng nuai 3,300) aṭangin 892 (cheng nuai 5551.53) tih hlawhtlin (168.19%) a ni.

■ PMMY kaltlangin Sishu hnuaiah mi 42, Kishore hnuaiah mi 194, Tarun hnuaiah mi 59, Stand up India hnuaiah mi pathum, an vaiin mi 298 hnenah loan cheng nuai 1248.63 pek a ni.

■ Social Security Scheme - PMJDY hnuaiah mi 23,520 leh PMJJBY hnuaiah mi 14,571 an inziaklut tawh a, hamṭhatna dawng thei tur 42,847 aṭangin inziaklut nawn leh 6,418 an awm.

■ PMSBY hnuaia inziaklut mi 38,367 awmin, hamṭhatna dawng thei tur 55,783 aṭangin inziaklut nawn leh mi 11,448 an awm. APY hnuaiah mi 1,041 an inziaklut tawh.

■ Priority Sector hnuaiah NPA cheng nuai 2968.04 (13.84%) leh Non Priority Sector hnuaiah NPA cheng nuai 245.89 (1.74%) an awm.

■ Financial Literacy Campaign (FLC) ṭum 73 neih a ni a, hemi kaltlang hian mi 2,894 chuangte bank chhawr ṭangkai dan zirtir an ni.