MNF hi martarte thisena bual a ni - MNYF Vice President

Mizo National Youth Front (MNYF) chuan tunlai hian Aizawl khawpui chhunga MNYF block hrang hrangte tlawh­chhuah prog­ramme an buatsaih a, an inhmuh­khawmnaah MNYF vice president Zodinpuia chuan, MNF chu martarte thisenin a bual a nih thu a sawi.

MNYF Vice President chuan MNF chu ṭhalai din, martarte thisenin a bual a nih thu sawiin, "Pu Laldenga kha MNF president a nihin kum 34 mi chauh a ni. Pu Zoramthanga hi MNF vice president a nih khan kum 35 mi chauh a la ni. MNF hi Mizo nationalism lungphum hmu chhuak a, vawnghim rengtu a nih avangin kan ram leh hnam himna MNF chuan a dah pawimawh hmasa ber. Sorkarna chan ringawt hi MNF dinchhan a ni lo," a ti

Zodinpuia chuan kumin MLA inthlanpui lo awm turah eptu party zingah MNF elpha an la awm lo nia sawiin, "MNF-in nghet takin sorkarna a siam leh ngei dawn. Mizo hnam thuthlunga din MNF danglamna chu Mizoram mipui mai ni lo, Myanmar, Bangladesh leh Manipur-a kan unaute pawhin an hmuin an hria," a ti a, ram danga awm Zo hnahthlak unaute'n harsatna an tawhin MNF chuan a thlir liam ngai lo niin a sawi.