ZPM hi beihtham kan ni ve ta - ZPM Leader

ZPM chuan nimin khan Marpara North leh Marpara South-ah vantlang inkhawm an buatsaih a, he huna thusawitu ZPM leader Lalduhoma chuan ZPM chu party dang tan beihtham an nih ve tawh thu a sawi.

Lalduhoma chuan ZPM-in beih an tawk nasa ve ta hle tih sawiin, "Beihtham kan lo ni ve ta tihna a ni. Pathian zarah hma kan sawn nasa hle a, ruling lai phei chuan an theihna zawng zawngin min bei mek. Kum 2018 hnu lama inthlan awm reng rengah hma kan sawn zel a, tun hnaia inthlan kan hmachhawn hrang hrangah phei chuan kan rin phak bakin hma kan sawn a ni," a ti.

An party-in border trade an ngaih pawimawh thu sawiin ZPM Leader chuan, "Bangladesh chuan hma lain border-ah kawngpui ṭha tak a siam tawh a; Mizoram sorkar erawh chuan engmah a la ti lo. Kan kawngpuite hi a chhe em em," a ti a, ṭha taka sumdawnna a kal theih nan kawngpui ṭha an mamawh thu a sawi.

Lalduhoma chuan Pathian zara an lo sorkar a nih chuan kawngpui ṭha hna hmasaah an nei dawn tih sawiin, "A chhawr ber tur chu ramria awmte an ni dawn. He border trade hi a pawimawh em em a, state dang nena buaina a lo awm a nih pawhin Bangladesh lam aṭangin kan mamawhte kan la lut thei dawn a ni," a ti.

ZPM thuchhuah tarlan danin, Lalduhoma hian Thorang biala ZPM block pali huam chhunga khaw hrang hrang Laisawral, Bunghmun leh Sesawm aṭangin ZPM zawm thar mi 75 a lawm lut nghal a ni.