LSC hmanga inbumna a hluar - Aizawl SP

Aizawl SP Rex Zarzoliana chuan thuchhuah siamin, Aizawl district-ah land settlement certificate (LSC) hmanga inbumna a hluar thu leh kum 2020-22 chhungin LSC hmanga inbumna thubuai 33 ziahluh a nih thu a tarlang.

Aizawl SP chuan LSC hmanga inbumna lakah mipuite fimkhur turin a chah a, "Tun hnaiah LSC hmangin kawng hrang hranga inbumna Aizawl district chhungah a hluar hle. Mi bum chingte hian LSC lem chu zuarin, an LSC lem hmang chuan mi ramte kawhhmuhin an leitir ṭhin a, pawisa an inhlan fel vek hnuah a ram tak tak hmuh tur awm lo leh midang ram lo ni daih site a awm," a ti.

Midang LSC chu pawisa pein an hawhsak ṭhin tih tarlangin Aizawl SP chuan, "LSC neitute hriat lohin bank-ah loan lak nan leh, mimal hnenah te dahkhama pawisa pûk nante an hmansak ṭhin," a ti a, hetianga mi bum chingte hi IPC Section 420 hmangin kum sarih thleng lung in tàn tir emaw, pawisa chawitir emawa hrem theih an nih thu a tarlang.