KHAWTHLIR

MZU-ah conference

Mizoram University-a Department of Tourism and Hospitality Management chuan researcher, academician leh zirlaiten tourism leh hospitality industry-a hmasawnna an neih theih nan nimin khan MZU-ah 'International Conference on Rede­fining Tourism Through G20’s Key Priority Areas (KPAs)' an buatsaih a, vawiinah chhunzawma zawh a ni ang.

Manipur buaina sawiho a ni

MZP hruaitute leh Indigenous Tribal Leaders Forum (ITLF), Manipur hruaitute chu nimin khan MZP pisa-ah an inkhawm a, Manipur buaina inṭan dan leh he buaina avanga Zofate tawrhna chungchang sawiho a ni. MZP chuan Manipur-a Zofate chu a ṭul angin ṭanpui zel an tum thu an sawi. ITLF hruaitute chuan Manipur Zofate’n ei leh barah harsatna an tawh mek thu leh ei leh bar lakluhna atana pawimawh Tuivai lei chu fur ruahtui tlak hmaa thawmṭhat an duh thu an tarlang.

Tanker accident-ah thi

Ṭawipui North aṭanga Silchar pana tlan oil tanker AS/06 AC - 1359 chu nimin chawhma dar 10:45 vel khan Sekhum, Lunglei district daiah a let a, a khalhtu Lalṭanpuia (33) s/o Lobin Marandi, Ṭawipui North a delhhlum. Thudawn danin, tanker-ah hian Laṭanpuia leh a pa Lobin Marandi an chuang a, a pa erawhin hliamna lutuk a tuar lo.

Remna Ni

Lunglei DC Ramdinliani kaihhruaiin nimin khan DC conference hall-ah sorkar hotuten kumina Remna Ni (June ni 30) hman dan tur an sawiho a; Convention Center-ah hman ni se an ti. Remna Ni lawmna pual hian June thla chhungin free health camp, Lunglei Municipal area-a veng tinah faina hnatlangpui neih, peace walk, blood donation camp, thing phun, painting & photography contest, quiz & essay competition, digital flyer & short video competition te buatsaih an rêl bawk.

Lehkhabu tlangzarh

Rev. Dr Ramengliana, NEICC general secretary lehkhabu ziah, 'Kristian Khawthlir' tih chu nimin khan Dr Lalzirmawia Chhangte, IAS-in Synod Conference Centre-ah a tlangzarh. He lehkhabu hi phek 500-a chhah niin Rs 500 man a ni.