MPF-in retheite retheihna denchhena suma vote lei lo turin party-te an ngen

Mizoram People Forum (MPF) hruaitute chuan nimin khan Aizawl Press Club-ah thuthar theh­darhtute kawmin, kumin kum­tawpa MLA inthlan lo awm turah retheite an retheihna den­chhena sum leh therhlo hmanga vote lei lo turin political party-te an ngen a, mipuite pawh an vote hralh lo turin an ngen nghal.

MPF general secretary Rev. Lalramliana Pachuau chuan MPF leh political party-te thawhhona thuthlung rinawm taka zawm ṭheuh turin party tinte an ngen thar tih sawiin, "Hun kal tawh leh kan hun tawng mek kan han thlir hian kumin inthlanpui lo awm turah hian sum leh therhlo chi hrang hrang chelekna a nasa viau ang tih hlauhthawnna a nasa viau mai," a ti.

Rev. Lalramliana chuan vote lei hian nasa takin nungchang a tichhia tih sawiin, "Mi retheite an retheihna den­chhena sum tlem têa an vote lei hian anmahniah nghawng ṭha lo tak a nei ṭhin a ni. Chuvangin candidate-te leh an campaigner zawng zawngte hnenah sum leh therhlo hmanga campaign lo tur leh vote lei lo turin kan ngen," a ti a, thianghlim taka campaign nise an duhthu a sawi.

MPF leh political party-te thawh­hona thuthlungah chuan 'Mimal chung­chang leh tual­chhung thil chauh ni loin, party policy leh manifesto-te hi cam­paign nan hman ni se. Dawt leh thu belhchian dawl lo leh finfiah nghal theih loh hmangte-a inbeih hi tuman tih loh ni se' tih a nih thu sawiin MPF Gen. Secy chuan, a hlawhtlin ngei theih nan theihtawpa ṭan la ṭheuh turin party tinte an ngen thu a sawi.

Rev. Lalramliana Pachuau chuan party insawi­­chhiat vak vak hi tih loh ni se an duhthu sawiin, " Sorkar kal tawh leh kal mekten kan ram tan thil ṭha tak tak an ti tawh tih kan hre ṭheuh. Thil ṭha tih engmah nei lo ang maia inchirhtheh vak vak te hi a ṭha lo. An thil tih chhunzawm tlakte chu chhunzawm zel hi a puitling zia zawk a ni," a ti.

MPF hruaitute chuan MPF chu kohhran pawl hrang hrang leh tlawmngai pawl-te thawhhona a nih thu sawiin, "MPF hian party mal ṭan bik leh ṭan loh bik a nei lo a, duhsak bik a nei hek lo. Kan ramah hian inthlanna muanawm, thianghlim leh dik te, sorkar ṭha tak te a lo awm theih hi MPF chuan a duh ber. Sorkar ṭha a awm theihna atan theihtawp kan chhuahzel dawn," a ti.

Zawhna chhangin MPF hruaitute chuan sum leh therhlo chelek a nih lohna atan theihtawp an chhuah dawn thu leh miin an tum tlat erawh chuan indan theih loh chin erawh a awm theih thu an sawi.