HSSLC 2023-ah mi 11,084 an pass

Mizoram Board of School Education (MBSE) chuan nimin chhun dar 12 khan HSSLC Examinations 2023 result a tichhuak a; zirlai exam 14,091 zinga 11,084 an pass. Pass percentage 78.66 a ni a, nikum 2022-a pass percentage 82.07% aiin a hniam zawk.

Kumin HSSLC Examination-ah hian nikum aiin exam hmachhawntu 2,183-in an tam zawk a, kumina exam hmachawntu zirlai 14,091-te chu regular student 13,917 leh private candidate 174 an ni. Regular-a exam zingah 11,012 (79.13%) pass in, private candidate zinga 72 (41.38%) an pass. Pass zawng zawng zirlai 11,084 zingah hmeichhia tam zawkin, 5,982 an ni a, mi 5,108 chu mipa an ni.

Zirlai pass 11,084 zinga 809 chu distinction-ah an pass a, nikumah mi 821 an pass. First division-ah3,451 (nikumah 4,058), second division-ah 4,268 (nikumah 3,559) leh third division-ah 2,556 (nikumah 1,335) an pass. Compartmental chance nei zirlai paruk (nikumah 67) chiah an awm a; zirlai 3,001 (nikumah 2,068) an fail thung.

Zirlai pass vekna sikul Arts-ah 54 (nikumah 56), Science-ah pahnih (nikumah paruk) leh Commerce-ah panga (nikumah pahnih) a awm. Zirlai fail vekna sikul pahnih - Arts-ah Christian HSS, Siaha leh Science-ah Tlabung HSS-te a awm bawk.

Kumin HSSLC exam-ah hian stream tina topper-te chu mipa vek an ni.

Arts-ah Rodinpuia Ralte d/o Lalremruata, Home Missions School pakhatna niin, mark 469 a hmu a; Arts-a top 10-a lang mi 15 zinga 11 chu hmeichhia an a, hnam dang pakhat a tel.

Science-ah Jonathan Lalhruaitluanga s/o C Lalduhawma, St. Joseph HSS chu pakhatna niin, mark 458 a hmu a; top 10-a lang mi 11 zinga paruk chu mipa an ni.

Commerce-ah Vanlaldika s/o Lalfakawma Hauhnar, St. Paul's HSS chu pakhatna niin, mark 473 a hmu a, top 10-a lang mi 14 zinga pakua chu mipa an ni a, hnam dang pakhat a tel.

HSSLC 2023-ah hian Arts stream bikah zirlai exam 10,216 (nikumah 9,007) zinga 8,003 (78.34%) an pass a, nikumah 7,586 (84.22%) a ni a, mi 2,212 (nikumah 1,363) fail-in, compartmental chance nei pakhat a awm. Distinction-ah mi 521 (nikumah 620), first division-ah 1,985 (nikumah 2,724), second division-ah 3,129 (nikumah 2,965) leh third division-ah 2,368 (nikumah 1,277) an pass.

Science-ah zirlai exam 3,075 (nikumah 2,212) zinga 2,389 (77.69%) an pass a, nikumah 1,667 (75.36%) an pass; zirlai 681 (nikumah 537) fail-in, compartmental chance nei mi panga an awm. Distinction-ah mi 199 (nikumah 137), first division-ah 1,224 (nikumah 1,128), second division-ah 894 (nikumah 388) leh third division-ah 72 (nikumah 14) an pass a ni.

Commerce-ah zirlai 800 zinga 692 (86.50%) an pass a, nikumah zirlai 75.47% an pass a, zirlai 108 (nikumah 168) an fail. Distinction-ah zirlai 89 (nikumah 64), first division-ah 242 (nikumah 206), second division-ah 245 (nikumah 206) leh third division-ah 116 (nikumah 44) an pass.