Mizo zawng zawng rorelna khat hnuaia awmtir hi MNF thil tum a ni - Zoramthanga

MNF president leh chief minister Zoramthanga chuan nimin khan Mizo Hnam Rûna inkhawmah thu sawiin, MNF thil tum chu Mizo hnahthlak zawng zawng rorelna pakhat hnuaia awmtir a nih thu a sawi.

Zoramthanga chuan, "MNF Constitution en ila, kan thuthlungah Mizo hnahthlak zawng zawng rorelna khat hnuaia awmtir hi a thil tum a ni,” a ti a; rorelna pakhata awm tur chuan a tirah chuan Manipur, Tripura leh Assam-a chengte chauh a huam a, ram danga chengte a huam rih lo tih sawiin, "MNF chuan India-a awmte chu chhanchhuah theih an ni a, hei hi a thil tum hmasa a ni,” a ti.

MNF President chuan, "Kum 1986-a India nen remna tura inbiaknaah Zo hnahthlakte chu rorelna pakhat (administrative unit) hnuaia awm turin kan nawr a. India sorkar chuan Danpui Article 3-ah a awm sa avangin comment pek ngai an ti lo,” a ti a; chu chu Peace Accord-ah ziah a nih thu a sawi.

Tuna Manipur buaina chungchangah Zoramthanga chuan, "Keini’n kan duh dan kan barh luih a rem lo. Article 3-na angin duh an thlang thei. Keini chuan kan bei tawh a, martar thisena baptis tawh an ni. Tunah chuan an kutah a awm tawh a, an inchhandam nan an duhthlanna a pawimawh. Keini chu Pu Denga hun lai aṭangin kan dinna a la ngai reng,” a ti.

Zoramthanga chuan, MNF-te'n inde­pendence an sual lo tiin party dangin sawi mah se, ṭhangthar leh zirlaite'n an chhang ṭhin niin a sawi a, "Ṭhenkhatin nationalist rawn inti mahse sabengtung, sakei vun sin ang chauh an ni," a ti a; MNF erawh chu martar thisena lei an nih thu a sawi.

MNF President chuan, "Hming hrang hrang invuahin tu'ma tih ngai loh campaign-na kutdawh account nen an rawn ti. Hei hi kalphung thar chu a ni!" tiin ZPM kal dan a sawi.

Finance Minister ni bawk Zorama chuan hripui avanga Mizoram sorkar sum dinhmun a ṭhat loh thu sawiin, "MLA term thar lo awm turah tupawh sorkar se la sum bawm ruak hi an hnawhkhat thei ang em? Ngaihtuah tham tak a ni," a ti bawk.