Arts stream zirlaite'n an chhiar tama ṭan an lak a ngai - MBSE Chairman

HSSLC Examinations 2023 result chungchangah nimin khan Mizoram Board of School Education (MBSE) chairman JH Zoremthanga chuan thuthar thehdarhtute a kawm a; science leh commerce stream zirlaite pass percentage a ṭhat thu leh arts stream zirlaite'n an chhiar tama ṭan an lak a ngaih thu a sawi.

JH Zoremthanga chuan, kumina HSSLC result leh nikum lama result chu khaikhin chi a nih loh thu a sawi a, "Nikum khan syllabus 30% tihtlem a ni a, kuminah erawh syllabus pumpui an zir avangin khaikhin chi a ni lo. Chutihrualin kumina science leh commerce result chuan nikum result a khûm a, arts result erawh a tlahniam. Science leh commerce zirlaite an serious tih a hriat a, subject awl zawka kan ngaih arts zirlaite'n an chhiar tama ṭan an lak a ngai a ni," a ti.

HSSLC Examination, 2023 result tluang taka tihchhuah a ni chu MBSE hnuaia thawktute inpekna vang a nih thu sawiin MBSE Chairman chuan, "Centre superintendent leh invigilator-te, Police department leh Health department pawhin an mawhphurhna ṭha takin an hlen chhuak a, kuminah hian naupang entawn hnawh-chhuah ngai an awm lo hi a lawmawm takzet," a ti a; pass tharte an lawmpui thu leh pass zo ve lote chu theihtawp chhuah zel tura an duh thu a sawi.

MBSE Chairman tarlan ṭhenkhat

▶ Compartment 6 an awm a, compart-ment exam buatsaih thuai tum niin, result complaint hun ni 7 hawn a ni.

▶ Exam centre 95-ah Arts school 190, Science school 49 leh Commerce school 24 aṭangin zirlai 14,091 an exam.

▶ Zirlai exam zingah mipa aiin hmeichhia 1,319-in an tam zawk.

▶ Pass zingah mipa aiin hmeichhia 880-in an tam zawk.

▶ Distinction-a pass 809 awmin, nikum aiin 12-in an tlem.

▶ First division-a pass 2,451 awmin, nikum aiin 607-in an tlem.

▶ Second division-a pass 4,268 awmin, nikum aiin 709-in an tam.

▶ Third division-a pass 2,556 awmin, nikum aiin 1,221-in an tam.