Khualten Mizoram khuate chu fai an ti - Dy. Chief Minister
Deputy chief minister Tawnluia chuan nimin khan Tuiriala Solid Waste Management Centre-ah damdawi-in bawlhhlawhte sawng-bawlna tur Common Bio-Medical Waste Treatment Facility sakna tur lungphum a phum. Dy CM chuan, khualzin miten Aizawl leh Mizoram khuate chu fai an tih thu a sawi.
Tawnluia chuan, Aizawl Smart City Limited hnuaiah hmasawnna ruhrel din leh buatsaih mek zel a nih thu a sawi a, "Damdawi-in aṭanga thli leh bawlhhlawh chi hrang hrangte hian mihring hriselna nasa takin a nghawng ṭhin. Khualzinmiten Aizawl leh Mizoram khuate chu fai an ti hle a, hei hi sorkar bakah khawtlang mipuite'n ṭan an lak nasat vang a ni," a ti a, faina chu khualzinte hiptu tur leh Mizoram tan sum lakluhna ṭha tak tur a nih theih thu a sawi.
Project hi zawhfel thuai a nih theih nan contractor-te chu chak zawk leh ṭha taka hnathawk tura chahin Dy Chief Minister chuan, Bio-Medical Waste Treatment Facility sakna tur hmun petu Tuirial Airfield veng VC, khawtlang hruaitu leh veng mipuite chungah lawmthu a sawi a, "Sorkarin khawpui vawnfai leh tihthianghlim a ngaipawimawh hle. Khawpui thianghlim tak nei turin hmalak zel a ni ang," a ti.
He hunah hian Aizawl mayor Lalrinenga Sailo pawhin thu a sawi.
Common Bio-Medical Waste Treatment Facility hi cheng nuai 760 senga sak tur a ni a, contractor chu M/s BL Engineering, Gujarat leh GI Infotech, Aizawl an ni. September 12, 2020-khan inremna ziahpui an ni a, June 9, 2023-ah zawh fel tura ruahman niin, tunah hian hna 15% thawh zawh tawh a ni.