Kohhran mipuite nen ṭang tlângin pPawisa chakna kan do dawn - Lalsawta

Mizoram Pradesh Congress Committee (MPCC) president Lalsawta chuan, CADC inthlanah pawisa chakna an buan hneh loh avangin sorkarna an siam zo ta lo niin a sawi a, inthlana pawisa chakna chu Mizoram mipui leh kohhran mipui nen ṭang tlângin an do dawn niin a sawi.

Lalsawta hian nimina Congress Bhavan-a inkhawmah thu sawiin, "Chakma district inthlanah pawisa chakna kan buan hneh lo a, sorkarna kan siam zo ta rih lo," a ti a; chutih laia Rengkhasya biala Congress candidate thlan tlin a ni chu Pathian hnathawh ni ngeia a hriat thu a sawi.

MPCC President chuan, "Mizoram mipui nena ṭang tlangin Mizoram hmun dangah chuan pawisa chakna kan hneh theih tawh ngei ka beisei, Mizoram mipui hi KS ang mai maia lei theih an ni tlat lo. Inthlana pawisa chakna hi Mizoram mipui, kohhran mipui nen ṭang tlangin kan do dawn a, inthlannaa candidate-te'n an senso, mipui sum hmanga rulh leh an tum ṭhin hi tihtawp kan tum dawn," a ti.

Mizoram inthlanpui awm turah an party chuan Lalpa lam an hawi nia sawiin Lalsawta chuan, "A duh phawt chuan sorkarna min pek hi a tan thil harsa a ni lo tih kan chiang," a ti a; sorkar ṭha din tumin, mi rethei zawkte tan ṭang puihna an buatsaih thu a sawi.

MPCC treasurer thar Dr Lalmalsawma Nghaka pawhin thu sawiin, Congress party chu Kristian pa din a nih avangin Congress-ah chuan Pathian chu an no. 1 a nih zel a ngaih thu a sawi a, "Hmasawnna duh a, awh vang ngawtin ring lo mite tawktarh apiang kan pawm ve zel a rem lo," a ti.

Dr Lalmalsawma chuan, "Ramin a mamawh chu mi hausa leh mi larte an ni kher lo a, zirna lama sang tak an ni hran lo. Mi dik, mi rinawm leh thil ṭha ti tura an mahni thlangtu mipui tana ding nghet ngamte hi a ni ramin a mamawh chu," a ti a; sorkar hrim hrim leh lal hrim hrim tuma tuihalnain ngaihtuahna dik lo leh rah ṭha lo a neih thuai ṭhin thu a sawi bawk.