ZPM-in VC suspend order sût an phût
ZPM chuan nimin khan Aizawl Press Club-ah thuthar thehdarhtute kawmin, April 19, 2023 khan Sumsuih ZPM Village Council chu ṭhiah a nih thu tarlangin, hei hi sût turin Mizoram sorkar an phût.
ZPM general secretary Eddy Zosangliana chuan Sumsuih VC hi Sumsuiha MNF party-te hêkna avanga ṭhiah a nih thu sawiin, "Sumsuih VC-te hi nikum April 19, 2022 khan MNF Unit-ten DLAO office, Aizawl hnenah hékin, ziakin an thlen. Suspend-na lehkhaah hian April 19, 2023-a issue angin lang mah se, April 27, 2023 zingah he lehkha hi VC te hian an hre ve chauh a ni," a ti.
MNF unit-ten an hêkna hi Sumsuih khuaah va endik a, sawiho turin LAD field inspector Lalrinzuala Pachuau tirh a nih thu sawiin Eddy Zosangliana chuan, "LAD chuan an dinhmun dik tak chhui chiang a, thutlukna leh thurâwn pe turin Ombudsment an hriattir ta a ni," a ti a, Ombudsment hian a hêktu leh an hèkate thu an zawhfiah thu a sawi.
ZPM GS tarlan danin, Sumsuih VC-te hêk an nihnate chu - safety reserve chhunga bawng vulh mi panga hnenah ram pêk a ni; supply reserve humhalh chungchangah thu an chhuah a, anmahni vêkin an bawhchhia; sorkarin lo hal hun a tih pêla hal; mi ram tihkan chungchangah action an la lo; safety reserve chhung an vawnghim zo lo, tihte a ni.
ZPM GS tarlan ṭhenkhat
1. Sumsuih VC-te hian bawng vulh ho tumah ram an pe lo a, VC term hmasa MNF VC-te ram pek a ni. MNF VC-te ram pek bulah hian khawtlang/mipui rorelna (Gram Sabha) chuan bawng vulhtuten an ran chaw hmun atan, ran an neih chhung atan chauha hman turin ran chaw hmun an hawhtir.
2. April 8, 2021 khan lo an haltir a, midang ruala hal ve lo April 9, 2021-a lo haltu Remruata chungah VC-ten action an la a, Rs 500 an chawitir a ni.
3. April 25, 2022 khan safety researve fund hnatlang an nei a, hetah hian Vanlalhluna thing zaitir chu man a ni a, hremna atan Rs 500 chawi tura lehkha pek nghal niin, a tukah a chawi.