Raltlan lo lutte awm dan en ngun a ṭul - PC Party

Peoples' Conference (PC) party hruaitute chuan nimin khan Aizawl Press Club-ah thuthar thehdarhtute an kawm a, Mizorama raltlan lo lutte awmdan en ngun a ṭul thu an sawi.

PC president Vanlalruata chuan, Mizoramah Bangladesh, Myanmar leh Manipur aṭangin raltlan eng emaw zat an lo luh thu a sawi a,"Ṭha taka lo dawnsawn hi kan tih tur a ni a, chutih rualin Mizoram chhunga an awm zui dan hi en ngun a ngai a, awmze neia control theih tura awmtir a ṭul," a ti.

Mizoram sorkarin raltlante enkawl zui dan turah zau zawka inrâwnkhawmna buatsaih se an duh thu sawiin Vanlalruata chuan, "Tun hnai khan raltlante awmna leh luhna hmun hrang hrang kan tlawh a, khawtlang tana hlawkpui zâwng te, anmahni tana ṭha tur zâwng te, hun kalzela kan hnam tana ṭha tur zâwng­tea inen­kawl a ngai a ni," a ti a; ral­tlante dawnsawn leh enkawl danah Mizoram leh hnam hmalam hun thlirthiam turin Mizo mipui a sawm nghal bawk.