Central YMA leh ITLF hruaitute an inkawm

Tun hnaia Manipur state tualchhung buaina avanga Manipur-a cheng Zo hnahthlak hnam pual pawl hrang hrangte intél khawmna tura din thar Indigenous Tribal Leaders Forum (ITLF) hruaitute chuan nimin khan an chairman Pagin Haokip hoin CYMA hruaitute an kawm.

ITLF chairman Pagin Haokip chuan, buaina an neih tirh phat aṭangin YMA hnena an tluk luh hma leh ṭanpuina an dil hma hauh aṭangin inpui nih tlin takin kawng engkimah ṭanpuina an hmuh avangin lawmthu sawiin, "Zo hnahthlak hnam hrang hrangten unau hmel hài lo nei tawh ṭhin mah ila, Pathian remruat angin tunah chuan kan duh emaw, duh lo emaw Mizoram mipuite kutah kan rawn tlu lut ta a ni," a ti.

Unauna ṭha tak nen an harsatna tawh mek pawh hi an hma chhawn thei tawh dâwn tih sawiin ITLF Chairman chuan, an hmalam hun atan Mizoram mipuite ṭanpuina leh chawmdawlna a ngen.

CYMA president R Lalngheta chuan, Manipur-a Zo hnahthlak ṭhenkhatte chungah a Mizo leh YMA ang pawhin lâwm chiah lohnate pawh an lo neih tawh ṭhin thu sawiin, "Hun kal tawh theihnghilh vekin kan unauten harsatna in tawh hi kan chunga tla ang tho a ni a, kan inkuangkuah theihna bân hian fân tawp a nei theiin ka ring lo," a ti.

Nunau leh tarchak lo zawk rawn tlan thlate pawh 'a thlum a âl kan ei za zel ang' tiin a lo thlamuan tih sawiin CYMA President chuan, "In pianthar tâk avangin kan lawm," a ti a, da leh ngai tawh lo turin YMA chuan an duh thu a sawi.

Nimin vêk khan Tripura-a Zo hnahthlak - Darlong leh Marak mipa vek 18, Manipur-a eibar zawnga awm, buaina avanga tangkhang tate chu Churachandpur-a YMA hruaituten Aizawl rawn thawn thlengin, CYMA-te hian an pisa-ah tukṭhuan an lo buatsaih sak hnuah nimin tlai khan Tripura lamah an thawn a ni.