KHAWTHLIR

Chief Minister-in hnathawh enpui

Chief minister Zoramthanga chuan nimin zing khan Tlawng kawnga Mission Veng Kristian Thlanmual hmun a tlawh a, a panna kawng siam ngaite a enpui. Chief Minister chuan Aizawl khawpui chhim lam vengte chu ram hmasawn zelah a pawimawh belhchhah zual zel tur thu a sawi a; khawtlang leh tlawmngai pawl hruaitute'n veng chhung hmasawnna hna hmachhawp an neihte an sawipui bawk.

INC chak

CADC inthlanpui 2023-a Rengkashya bialah vote 713 hmutu Indian National Congress (INC) candidate Doymoy Daveng Chakma chu thlan tlin a ni. BJP candidate tual thihna avanga MDC bial dang inthlan ruala inthlanna buatsaih theih lohna hmun Rengkashya bialah hian May 17, 2023 khan vote thlak a ni a, nimin khan vote chhiar niin INC candidate Doymoy Daveng Chakma chuan vote 713 a hmu a, MNF candidate Prema Ranjan Chakma chuan vote 572 leh BJP candidate Sukrity Chakma chuan vote 26 a hmu.

Buhfai hlan

Chin Baptist Church (CBC), USA leh MZP Hqrs., Kolasib ṭangkawp chuan Manipur buaina avanga Mizorama lo tlan lut Zo hnahthlak unau raltlante ṭanpuina atan Kolasib Sub. Hqrs. YMA kutah buhfai bag 60 an hlan.

ZPM inkhawm

ZPM party general headquarters chuan nimin khan an pisaah political session an hmang a; AMC corporator Ramthanzauvi chuan thu sawiin, “Party dangten kan karah hêm an thlak fo ṭhin a, kan hotuten sawiselna an tawh nasat poh leh malsawmna kan dawng zel zawk a ni," a ti. ZORO general secretary L Ramdinliana Renthlei pawhin thu a sawi.

MLA-in hawng

Mamit bialtu MLA H Lalzirliana chuan nimin khan Mamit DC ground-a Sadbhav Mandap building thar a hawng. H Lalzirliana chuan Mamit leh Lawngtlai district chauhin an neih theih Mizorama a hmasa ber tur multipurpose community centre hawn a ni ta chu thil chhin­chhiahtlak leh lawmawm tak a nih thu a sawi.