Dan loa dawr hawn ni ngeia hriat 63 CYMA hmalaknain khar tir an ni

May 20, Inrinni khan Aizawl khawpui chhunga iron rod, cement leh balu zawrhna dawr, dan loa hawn nia ngeia hriat 63-te chu Central YMA hma­laknain khar tir an ni.

Heng dawr khar sakte hi hnam dangin Mizo hming hawha an hawn ni ngeia hriatte an ni a, dawr khar tir tura chhinchhiah ṭhenkhat chu an lo in khar tawh a, hnam dang ṭhenkhat chuan Mizo hnenah an dawrte an lo hlan chhâwng hman. Dawr khar tir tura chhinchhiahahte hian CYMA hruaitute chu kalin, khar turin an ngen. CYMA ngenna angin dawr 63 chu khar a ni.

CYMA chuan an kumpuan 'Ram leh Hnam Humhalh' kawnga an hmalakna chi khat atan Mizo hming hawha hnam dangten iron rod, cement leh balu dawr an hawnte, Mizoten hnam dang thurualpuia hetiang lama sumdawnna kalpuite chu hun eng emaw chen an zirchian hnuah list an siam chhuak a ni.

ALL Mizoram Cement & Iron Rod Dealers Association (AMCIRDA) te zirchianna nena en kawp chungin, chûng aṭanga rinhelh kai dawr 91-te chu CYMA chuan an dawrah an kalchilh a ni.

CYMA-te hian an list-a awm zawng zawng dawr neitute leh an dawr awmna area branch YMA hruaitu ṭheuhte chu April 10, 2023 khan CYMA Hall-ah ko khawmin, dan loa dawr hawng tawh lo turin an ngen. He hunah hian April 10 aṭanga thla 1 chhungin an thurualpui hnam dangte nen inchingfel tura tih an ni.

Thla 1 ral hnu May 12 khan dawr awmna huam chhunga branch YMA hruaitute leh CYMA hruaitute chu inrâwnkhawm lehin, May 20 khan hnatlangin an che chhuak ta a ni.

CYMA president R Lalngheta chuan, an hmalak zel dan tur chu commi­ttee-in a la rêl tur thu sawiin, "Thla khat chhunga lo inching fel tura ngenna ngai­pawi­mawha an dawr khar tawhte, an hnam ­dang kawpte lo titawp mi eng emaw zatte chungah lawmthu kan sawi a ni," a ti a, Mizo­rama sum­dawnna hnam dang kuta a lut nasa lutuk chu Mizo hnam tan a him loh thu a sawi.

Mizo mipuite ṭanrual a ṭul tak zet tih sawiin R Lalngheta chuan, "Iron rod, cement leh balu hmanga sumdawnna pawh hi Mizote kutah ngei a hlâwkna tam ber a luan luh hi kan duh tak zet zet. Hnam dang dan loa lo sumdawn puitute pawh anmahni kut ngeia an sumdawnna a awm theih nan hma kan la zel dâwn a ni," a ti a, an hmalakna kawngah Mizo mipui zawng zawngte thlawpna leh ṭawiawmna a ngen.