India ram pawna Mizo nurse-te thawn turin hma kan la - MYC Chairman

Mizoram Youth Commission (MYC) chairman Dr Van­lal­ṭanpuia, MLA chuan May 20, Inrinni khan Aizawl Press Club-ah thuthar thehdarhtute kawmin, India ram pawn (foreign), a bik takin commonwealth ram leh United Kingdom-ah Mizo nurse-te thawn an nih theihna atan hma an lak thu a sawi.

Dr Vanlalṭanpuia chuan, commonwealth leh UK-a nurse tirh an nih theihna atan an tirh tura ten International English Language Testing System (IELTS) leh Occupational English Test (OET) an paltlang a ngaih thu a sawi a, "Mizo nurse-ten awlsam zawka IELTS leh OET an paltlang theihna atan hma lak a ni a, sap pachal an titipui theih dan turte ngaihtuah a ni," a ti.

UK-a nurse thawk tur thawn chhuak hnem bertu Swindon, London-a ARYAVRAT (Charcos India) Company an dawr thu sawiin MYC Chairman chuam "English instructor-te ka kawm a, English zirna changtlung neih dan tur bakah, an­mahni ngeiin Mizo ṭhalaite zirtirna an pek theih dan tur ka sawipui," a ti a, a hlawhtlin theih ngei an beisei thu a sawi.

Dr Vanlalṭanpuia chuan London-ah Dept of Health & Social Care hotu Dave Howard leh Dept of Health & Social Care hotu Rhian Wells a kawm thu sawiin, "Mizo ṭhalaite tan hnathawh tur awm thei chi hrang hrang leh Mizo ṭhalaite luh ve theih dan tur kan sawiho. British Sorkar hnuaia nurse hna tam tak a awm thu an sawi," a ti.

Pachhunga University College leh Royal Holloway University of London thawh dunna tura ruahmanna awm mek pawh a bawhzui thu sawiin Dr Vanlalṭanpuia chuan, "Royal Holloway University hotute nen kan inkawm a, PUC nena thawhdunna tur hmawr kan bawk fel," a ti a, hun rei loteah inremna ziah a beisei thu a sawi.