Mawhrei khuain electric hrui siamṭhat hnatlang nei

Siaha district-a Mawhrei leh Chapi khuate chuan electric hrui chat avanga ni nga chhung êng an neih tawh loh hnuah May 19-20, 2023 khan Mawreh khua chuan electric hrui siam hnatlang an ko a, mi 120 vel an thawkchhuak.

Mawhrei aṭanga thudawn danin, Mawhrei khuaah hian kum 2000 aṭanga kawlphetha (electric) a lut ṭanin Tipa Sub-Division, Power & Electricity department hnuaiah an awm a; kawlphetha a luh aṭang hian mumal takin consumer committee dinin theitawp chhuahin enkawl a ni.

Kumtin deuh thawh electric hrui hi a chat a, a chhiat a piangin khawtlangin siamṭhat hnatlang an nei ṭhin. Hnatlang hian hrui siamṭhat te, ban sawn te, thingkungin electric hrui a delh siamṭhatte an thawk ṭhin a; VC-ten mi tlawmngai zual mi pathum ruatin, hemite hian kar tin an vil ṭhin. Sorkar aṭangin hamṭhatna an dawng ngai lo.

Electric hrui kalnaah hian thingkung lian a tam em avangin harsatna hi a thleng fo a, electric ban leh hrui kalna hi kawngpuiah sawn turin sorkarah an thlen tawh tih sawiin Mawhrei khaw mite chuan, "Vawi tam tak kan harsatnate chu kan lo thlen tawh a, mah se tun thlengin ala hlawtling thei lo," an ti a, electric ban leh a hrui sawn turin mimal contract hmu an awm thu leh hmalakna erawh ala awm loh thu an sawi.

PE department aṭangin viltu /duty mi pakhat dah nih mah se, labour hi an indaih loh hle nia an hriat thu an sawi bawk.