Mizoram Mega Job Fair kaltlangin ṭhalai hna hmu 120 an awm tawh

Sorkar laipuia Central Building & Other Construction Workers (CBOCW) Advisory Board chairman V Srinivasa Naidu, Governor Dr Hari Babu Kambhampati leh Labour, Employment, Skill Development and Entrepreneurship (LESDE) hotute chu May 18, Ningani zan khan Raj Bhavan-ah an inkawm. Mizoram Mega Job Fair kaltlangin ṭhalai hna hmu thar 120 an awm tawh tih tarlan a ni.

Inkawmhonaah hian LESDE department hotute chuan Larsap leh CBOCW Advisory Board Chairman te chu Mizoram Building & Other Construction Workers Welfare Board (MB&OCWWB) chanchin tlangpui – an hmalakna, hlawhtlinna leh harsatna an tawh mekte an hrilh a; Larsap chuan inhlawhfa ṭhinte'n hamṭhatna tam zawk an neih theih nan insurance scheme dang Pradhan Mantri Jeevan Jyoti Bima Yojana (PMJJBY) leh Pradhan Mantri Suraksha Bima Yojana (PMSBY)-ahte inziaklut se a duhsak thu a sawi.

MBOCWWB hi kum 2009-ah din a ni a, hamṭhatna hrang hrang - Children's Educational Assistance, Medical Assistance, Disability Benefits, Death Benefits etc. te an nei.

A din tirh aṭangin cheng vbc 231.82 a hmu tawh a, inhlawhfa mi 1,62,694-te hamṭhatna atan cheng vbc 115.6 a sem chhuak tawh. LESDE department-in tun hnaia Mizoram Mega Job Fair a buatsaih aṭangin ṭhalai hna hmu thar 120 an awm tawh a ni.