Congress party-in kan thutiam kan tihlawhtling lo ngai lo - MLA Rindika

Hachhek bialtu MLA Lalrindika Ralte chuan kar kal ta khan a bial Hachhek chhunga khaw hrang hrang a fang a, Congress party-in an thutiam an tihlawhtling lo ngai lo niin a sawi.

Lalrindika Ralte chuan, "Party-ah kan inhmanna la rei lo mahse kan hriat phak tawkah Congress party chuan a thutiam a tihlawhtling lo ngai lo. Kan ti ang an tih chu an ti mai zel," a ti.

Eptu party an ni chunga lawm luh tur an la nei zel chu lawmawm a tih thu sawiin Lalrindika chuan, "Pathian leh mipuite zara Congress party kan sorkar a nih chuan, mi harsa zawk, dinhmun hnuaihnung zawkte chhan chhuahna turin ṭang puihna Rs 2,00,000, a ṭul chuan a aia tam pawh kan pe dawn," a ti a; ṭang puihna pawisa sem tur chu NLUP anga chhungkaw tina sem dur dur tur a nih loh thu leh nasa taka hnathawk, ding chhuak thei si lote puihna tur a nih thu a sawi.

Lalrindika Ralte chuan, Mizoram dinhmun a chhia nia sawiin, "Sorkar hnathawkte'n a hun takah hlawh an la thei lo a, tualthihna a tam em em a, dan pawisak lohna a lianin eirute an zalen em em. Hetiang zela kan ram hi a kal a nih chuan chhan chhuah tlak loh khawpin kan ram hi a awm thei a ni. Kan ram chhan chhuak tur chuan Pu Lalsawta hoin kan rawn pen chhuak a ni," a ti.