Sangau - Saisihchhuah kawng laihna tur Cheng vbc. 66 DoNER-in a hnukkir leh
Myanmar ram Chin Hills leh Mizoram inkal pawhna kawng pawimawh Sangau - Saisihchhuah, Lawngtlai district kawng laihna tur sum cheng vbc. 66 chu DoNER Ministry-in a hnukkir leh niin Mizoram State Planning Board vice chairman H Rammawi hnen aṭanga Vanglaini chuan thu a dawng.
H Rammawi sawi danin, Sangau - Saisihchhuah kawng laihna tur atan hian 14th Finance Commission-in cheng vbc. 66 a dah a ni. PWD-in kawng laihna tur survey neiin, zangnadawmna tur sum ruahman tel a nih loh avangin Pang khua paltlang loa, ramhnuaia kawng kaltir turin ruahmanna an siam.
Hetihlai hian Pang khawtlang chuan an khaw paltlang loa kawng kaltlang tir an remti loa, kawng laitu tur BRO-te nen an inthurual a ni. Pang khua hi a paltlang a nih chuan zangnadawmna pek ngai chhungkaw 70 vel an awm dawn a, a project-ah zangnadawmna a tel si loh avangin tihngaihna a awm lo.
Mizoram sorkar chuan kawng laih hna chu BRO aṭanga PWD kuta hlan turin thuneitute ngen ṭhin mah se, a tlang thei loh avangin sum awm mah se, hna thawh theih a ni lo.
Rei tak hnathawh theih a nih tak loh avang hian DoNER Secretary hoa May 19, 2023-a INMC ṭhukhawm chuan Sangau - Sasihchhuah kawng laihna tur cheng vbc. 66 hi a cancel ta a ni.
Sangau - Sasihchhuah ruala project pathum pawm - Hnahlan leh Ṭiau inkar, Champhai Zote leh Ṭiau inkar leh Lungbun leh Chhimtui inkarte chu formation cutting an zo vek tawh a, backtopping hna thawh mek a ni tawh hlawm.