Mizo ṭhalaiten rual an awt; ZPM-ah rinna nghatin an zawm ruih ruih - Duhoma

ZPM leader Lalduhoma, MLA chuan May 20, Inrinni khan Dampa West huam chhunga khaw hrang hrang tlawhkualin, ZPM chu mimal hamṭhatna atan ni lo, ram tana din a nih thu a sawi a; Mizo ṭhalaite'n hmasawn duhin rual an awt hle tih sawiin ZPM chu an rualawhna phuhru theiah ngaiin an ring tawk a, an zawm ruih ruih niin a sawi.

ZPM Leader chuan, Mizorama ṭhalaite zingah lehkhathiam tak tak an tam tawh hle tih sawiin, "Hengte hi kaihhruai an ngai em em a ni. Ram danga ṭhalaite khawsak dan leh hnathawh dante kan hmuin kan hre zung zung thei tawh a, rual an awt em em a ni. Mi rama an tih theih hi kan ramah pawh tih theih a ni tih an hria a, chumi ti thei tura pui theitu tur chu ZPM hi a ni tih an hria," a ti a, ṭhalaiten ZPM an zawm ruih ruih niin a sawi.

ZPM a sorkar dawn tih hi ruling party-te hian an ring nghet tlat nia a lan thu sawiin Lalduhoma chuan, "Nasa takin ZPM hi min bei mek. Mi thar duhawm tak takin min rawn zawm zel a, heng zinga rawn lut tam ber chu rorel lai party aṭangin a ni. Hei hian chiang taka a entir chu, tuna kan rama sorkar lai mek hian an party chhungah harsatna namen lo an tawk tih a tilang chiang hle," a ti.

Mizoramin mipuite phurrit chhâwktu tur sorkar a mamawh thu sawiin Lalduhoma chuan, "Chunglam thiltihthehna ring chungin kan ram hi kan dinchhuahpui theih ngei kan beisei. ZPM hi mimal hamṭhatna atana ding a ni loa, ram a dinchhuah theih nan a ding a ni," a ti.

ZPM Leader chuan, Dampa chu ruling bial, thil ti thei tak tak bial a ni ṭhin tih sawiin, "Amaherawhchu, ei leh bar kawngahte, inkalpawhna kawngpui chungchangahte in la hnufual em em. Khawsak phung thlengin kawng tam takah bial dang phak lohna in ngah hle," a ti a, an harsatna aṭanga chhanchhuah an nih theihna atana ṭhalai, ram leh hnam hmangaih tak leh Pathian ṭih mi bial viltu an nei chu a lawmpui thu a sawi.

ZPM thuchhuah tarlan danin, Lalduhoma hian Dampa bial chhung aṭangin an party-ah mithar 455 a lawmlut.