Thirsakawr hmanga India fanchhuah tum Governor leh Chief Minister nen inkawm

Thirsakawr (bicycle) hmanga India ram state 28 tlawhchhuak tura state hrang hranga kal mek Aasha Malviya-i chu May 19, 2023 khan Governor Dr Hari Babu Kambhampati nen Raj Bhavan-ah an inkawm a; May 20, Inrinni khan chief minister Zoramthanga nen CM Bangla-ah an inkawm leh.

Raj Bhavan-a inkawmnaah Dr Hari Babu Kambhampati chuan, Aasha Malviya-i hmalakna chu India mipuite zingah harh tharna thlentu a nih ngei a beisei thu a sawi a; tluang taka a hmabakte a tih zel theih nan duhsakna a hlan.

Chief Minister chuan a huaisenna chu fakawm a tih thu Aasha Malviya-i hi hrilhin, a kal zelna turah duhsakna a hlan nghal.

Sports & Youth Services minister Robert Romawia Royte chuan Inrinni zingah khan Aasha Malviya-i hi tukṭhuan a buatsaih sak a; DGP Devesh Chandra Srivastva nen pawh an inkawm.

Aasha Malviya-i hian hmeichhiate himna leh dinhmun chawisan a nih theih nana mipuite hnena zirtina thlenna atana thirsakawr hmanga state 28 tlawh chhuak tur hian November 1, 2022 khan Bhopal, Madhya Pradesh aṭanga bul a ṭan a, state 18 a kal tawh.

Mizoram hi state a tlawh 19-na a ni a, km 16,200 a tlan tawh a ni. A ruahman dan chuan km 25,000 tlanin state 28 tlawhchhuah a tum.