KHAWTHLIR
Thisen pe
May 20, Inrinni khan SAY Central North Division chuan thisen pek runpui an huaihawt a, mipa 70 leh hmeichhia 20-te'n Civil Hospital, Aizawl tan thisen unit 90 an pe. Civil Hospital tan vêk Kanan Veng Branch YMA pawhin an golden jubilee pualin thisen unit 67 an pe a, petute mipa 63 leh hmeichhia pali an ni. Inrinni vêk khan KṬP, Ṭhuampui Bialin Synod Hospital tan thisen unit 37 pein, petute mipa 31 leh hmeichhia paruk an ni a; ṬKP, Diltlang Bial pawhin Lawngtlai District Hospital tan thisen unit 50 (mipa 43 leh hmeichhia pasarih) an pe.
Chief Minister-in lawmpuina hlan
May 20, Inrinni khan Aizawl East-I bialtu MLA, chief minister Zoramthanga chuan HSLC exam-a pakhatna, a bial chhung a mi Cynthia Lalhlupuii Shangpliang, Falkland chu an chenna inah kalin, lawmpuina atan citation leh laptop a pe. Chief Minister chuan Cynthia-i chu a kal zelna turah duhsakna hlanin, taimakna leh tumruhna nen bei chhunzawm zel turin a chah.
Tuiah tlahlum
Lalruatdika (16), Champhai Venglai chu May 20, Inrinni chawhma khan Tuipui Dam liah a tlahlum. Lalruatdika hi a ṭhiante nen class 10 an pass lawm turin Tuipuiah hian an kal a, tui an cheng ṭan chauh tiah tuiah hian a chelsual a, tui thiamten la chhuak thuai mah se, a nunna chhan hman a ni lo.
Thenzawlah festival
Tourism dept, Serchhip DC leh Thenzawl SDO (Civil)-te chuan May 19-20, 2023 khan Thenzawl Golf Course & Resort-ah khualzinte hipna tura hmalakna atan Thenzawl Calling Festival an buatsaih a; eisiam, band, golf, cooking, cultural dance-ah te intihsiakna leh handloom & handicraft exhibition-te neih a ni.
Silai lei turin License ngai
Aizawl Bawrhsap chuan silai Aizawl disrtict-a silai zuar leh lei turte chuan license an neih a ngaih thu leh dan in a phal loh thil ti luite chu an licence tih tawp sak bakah dan anga hrem an nih tur thu a tarlang a, "Tupawh silai lei/ zuar tur chuan a silai lei/ zuar tupa nen valid arms licence an nei ve ve tur a ni. Silai lei/zuar tur chuan phalna lehkha hi an awmna District Magistrate hnenah lak hmasak tur a ni," a ti