Skywalk leh ropeway thubuai ACB-te'n an chhui zo tawh
Chaltlang leh Durtlang inkara ropeway siam leh Sakawrhmuituai tlanga skywalk siam chungchang Lokayukta-in chhui tura a ruat Anti Corruption Bureau (ACB) chuan an chhui zo tawh.
Vanglaini zawhna chhangin ACB hotute chuan, skywalk leh ropeway thubuai an chhui zawh tawh thu hi an sawi a, "Kan chhuina report Lokayukta-ah kan thehlut tawh. Tuna kan kalpui hi chu preliminary inquiry chauh a ni a, engtin nge kalpui a nih zel dawn keini chuan kan hre lo," an ti.
ACB-te hian skywalk leh ropeway thubuai an chhuina report hi Lokayukta-ah an thehluhna a rei leh deuh tawh a, Lokayukta aṭangin engtin nge kalpui zel a nih dawn an la hre lo.
Lokayukta chuan ACB-te chhuina report hi zirchiangin, he thubuai kalpui a nih zel dan turah thutlukna an siam dawn. Lokayukta hian ACB-te chhui chian lehzual tir emaw, CBI chhui tir emaw, thubuai ti tawp turin thutlukna an siam thei a ni.
Tarlan tawh angin, MNF party-a Vigilance department leh Legal Board-te chuan skywalk leh ropeway siamnaah thil dik lo a awm nia ngaiin November 22, 2021 khan Lokayukta-ah complaint an thehlut a ni.
December 7, 2021 khan chhui phal dilna Mizoram sorkara Vigilance department-ah thehluh a ni a; Vigilance-in a zir chian hnuah December 17, 2021 khan chhui phalna a tichhuak a, ACB chuan December 22, 2021-ah chhui phalna an dawng.
Tourism department pawhin skywalk leh ropeway chungchang hi chhui chian ṭha an tih avangin an Director hmingin February 3, 2022 khan Lokayukta-ah an thlen. Chhui ṭul an tih chhan te, contract agreement te, contract amount te, rinhlelh an neih leh neih lohte leh thil dang dang Lokayukta chuan Tourism department hnenah a zawt lêt a ni.
Tourism department chuan Lokayukta zawhna hrang hrangte an chhang a; rinhlelh an neih leh neih loh zawhnaah erawh chuan, rinhlelh mimal/ company tarlan an nei lo a ni.