Harsatna tâwk naupangte nihna tarlan hi danin a khap - MSCPCR
Mizoram State Commission for Protection of Child Rights (MSCPCR) chuan tunhnaia court-in pawngsualtu hremna a pek leh matric exam result nghawng avanga naupang kumtling loin a nunna a lâk chungchangah an nihna (identity) chhuichhuah leh hriat theih tura social media/ media-a tarlan a ni chu pawi an tih thu a tarlang a; hetianga naupang nihna chhuichhuah theih tura tarlan hi danin a khap tih a tarlang.
MSCPCR chuan, harsatna tâwk naupangte emaw, dan nena inrem loa che naupangte nihna mipui tana chhuichhuah theih tura an hming, veng, khua, thlalak, zirna-in leh naupang nihna tarlang tute chu The Prevention of Children From Sexual Offences Act, 2012 Section 23 leh The Juvenile Justice Act, 2015 Section 74 hmanga hrem theih an nih thu tarlangin, "Hetianga ti an awm leh a nih chuan MSCPCR chuan dan angin hma a la dawn a ni," a ti a; naupangte dikna chanvo humhim kawngah media mi te bakah mipuite thawhhopui turin a sawm nghal a ni.