Mi ṭha tak takin Congress an pan mek - MPCC Treasurer

Mizoram Pradesh Youth Congress Committee (MPYCC) hruai­tu atana ruat thar leh kal chhuak turte chuan nimin khan Congress Bhavan-ah charge an inhlan a, he hunah hian president kal chhuak, MPCC treasurer thar Dr Lalmalsawma chuan, mi ṭha tak takin Congress an pan mek thu a sawi.

MPCC Treaurer chuan, Mizoram ṭhalaite sorkar ṭha duhin an tuihal tih sawiin, "Kan chhehvela kan unaute pawh thlamuan ngaiin an rum mek. Hengte tan hian sorkar ṭha pe turin Mizoram mipuiin Congress party-ah beiseina an nei sang ber. Chûng an beiseina hlenchhuak tur chuan Pu Lalsawta an au a, a hoa sorkar ṭha siam tum Mizoram mamawh mi ṭha tak takin hnathawh tumin Congress an rawn pan mek. Anni nen ram hmasawnna hna thawkin sorkar ṭha kan siam dawn," a ti.

Ram tana thawk tura kal kawng pawimawh chanvo tak chu ṭhalaia mahni chanvo ṭha taka hlen chhuah a nih thu sawiin Dr Lalmalsawma chuan, "Chanvo hi khelh chhuah tur a ni loa, a thawha thawhchhuah tur a ni. Mi rintlak leh tlak lo tehna chu a chanvo a hlenchhuah danah a ni," a ti a, chhawr leh rintlak ni si lo, nihna chelh duh ṭhinten pawl kalphung an tih buai fo thu a sawi.

MPYCC president Laltawnliana Sailo pawhin thu sawiin Mizoramin sum harsatna a tawk tih sawiin, "Mizoram mipui kan buai a ni. Ṭhalai mi thiam tam tan eizawnna nei lo leh eizawnna nei pawhin harsatna na tawk leh mek. Heng harsatna sukiang a, thalaite'n an tuina zawn taka ei an zawn leh theihna turin sum leh pai enkawl thiam, mi rinawm leh kutfai Pu Lalsawta Pathianin Mizoram enkawl turin min pe," a ti.

Mizoram ṭhalaite ram hruaitu viak ṭha leh chak, mi fit, mi ram leh state te'n an neih ang neih ve chakin an tuihal nia sawiin, "Mizoram mamawh ang zelin Pathianin Congress party min her remin min buatsaih a, min hmang," a ti a, ram rawngbawl tura Congress party tana Pathian remruatna a fel vel vek niin a sawi.