ZPM lo sorkar tur an awm lo - ZPM President

ZPM chuan nimin khan an office-ah chhung inkhawm an hmang a, thu­sawitu ZPM president Lal­liansawta chuan, ZPM lo chu sorkarna siam thei tur party an awm lo niin a sawi.

ZPM President chuan sorkar siam turin an in­singsa mek nia sawiin, "ZPM lo chu sorkarna siam thei tur party dang an awm lo tih hi mipui ngaihdan leh hmuh dan a ni. ZPM hian kan dawhthleng tizauin hmun hrang hrang aṭanga lokal khawm mekte dawl zo turin kan inhawng zau a, puanven kan sawi chhìn a ngai," a ti.

Thusawitu dang ZPM PAC member TBC Lalven­chhunga chuan kalphung hluiah chuan politics hi game-ah an ngai tih sawiin, "A khelha khelh an tum ṭhin. Keini kalphung thar zuartute tan chuan politics hi game a ni ve lo," a ti a, ram hma­sawnna atan politics chu buaipui an nih thu a sawi.

TBC Lalvenchhunga chuan, CM ber pawhin 'ZPM chu sorkar ve chhin se eng an ni bik lo ang' a tih thu sawiin, "Eng kan nih bik zia hmuhtir kan tum. ZPM chuan kan chunga roreltu tur thlan kan tum loa, kan aiawh, mipui duh dan anga roreltu tur chhawp­chhuah kan tum. Bial vil tur kan in ruat tawh a, heng mite hi ZPM chuan a zuar loa, kalphung thar zawk kan zuar," a ti.