Champhai DC hoin fertilizers tawlhruk tur ven kawnga ṭanlak dan tur an rêl
Champhai District Vigilance Committee on Fertilizers chu nimin khan an chairman James Lalrinchhana, district bawrhsap kaihhruaiin DC conference hall-ah an ṭhukhawm a; approved dealer ni lote, state dang leh district dang qouta leichi (fertilizers) dan loa tawlhte leh district qouta-te pawh hmun danga tawlhruk a nih loh nan thlithlai ni se, an ti.
James Lalrinchhana chuan, loneitute'n an chanpual leiṭha kokim taka an hmuh theih nana ruahmanna siam chu sorkarin a ngaih pawimawh thu a sawi a, "Fertilizer dealer-te'n loneitute chanvo an kuta a thlen ngei theih nan theihtawp chhuah ang che u. Dan ang taka leiṭhate hralh chhuah a nih chuan buh leh bal thar chhuah kawngah hlawk zawkin kan kal thei dawn a ni." a ti.
Champhai tana sorkarin man tlawm zawk (subsidy)-a fertilizer a pekte chu hmun danga pawhpen a nih loh nan theihtawp chhuah a ṭul thu sawiin Bawrhsap chuan, "Champhai district chhunga dan loa leichi tawlhruk ṭhinte ven leh dap kawngah theihtawp chhuah tlan a pawimawh. District Vigilance Committee on Fertilizers-in ṭha taka hna a thawh theih nan hmalaknate inhrilhhriat zung zung leh, dan leh hria leh inkaihhruaina siamte ṭha taka zawm tlan a ṭul," a ti bawk.
Champhai district agriculture officer R Lalramhluni pawhin thu sawiin, sorkar laipuiin khua leh tuite tan subsidy sang tak siama leiṭha a chhawpchhuah thu a sawi a,"Hemi atan hian sorkar laipuiin sum vaibelchhe tam tak a seng a, kan vanneihna hi ṭangkai taka kan chhawr thiam a ṭul. Dan leh hrai mumal tak hmangin fertilizer tawlh leh tihral dante khuahkhirh a ni a, fertilizer hmangin 30-40% laiin buh leh bal thar a pung thei tura ngaih a ni," a ti a, ram a bua tawh avangin thingtlangah pawh kum 5 lêngahte thlawhhma lak a nih tawh thu a sawi.
Fertilizer dealer-te kudamah a kimbiaiin fertilizer thlen a ni em tih te, khawtual loneitute'n an dawng ngei em tih leh hmun danga hralhchhàwn a awm em tihte YMA nen ṭangkawpa enfiah ṭhin tum a nih thu sawiin DAO chuan, "Champhai aṭangin mimal anga la tawh loin, khaw tin tana allotment siamte a hlawma lain mahni khuaahte rualkhai taka sem chhuah tawh tura ruahman siam a ni a, mahni chanai hralhte erawh pek tawh loh tur a ni," a ti.
Ṭhukhawm chuan inkaihhruaina leh hmalak dan turte, dan tlawhchhan hrang hrangte, loneitute hmakhua ngaiin dan loa leichi lakluh, kawl leh tawlhruk ven kawngah ṭan lak zel a ṭul thute an sawi a; approved dealer ni lo te, state dang leh district dang qouta leichi tawlhte chu man zel tura tih niin, district qouta-te pawh hmun danga tawlhruk a nih loh nan thlithlai ni se, an ti.
Ṭhutkhawma tarlante
▶ Champhai district-ah fertilizer dealer pali - CR 2&3 Wheelers Work Vengthlang, Mami Store Venglai, LM Enterprise Zotlang, F Nghaka & Sons Vengthlang te a awm.
▶ Fertilizer phurh, kawl leh zawrh chhuah hi sorkar pawmpui approved dealer-te tan chauha tih a ni.
▶ Dan pawisa loa ti lui man chhuahte chungah dan anga hremna lekkawh theih a ni.
▶ Fertilizer dealer palite hian Apeil 2023 quota atan metric ton 70.83 (ip 1,574) ṭheuh an dawng tawh
▶ Dealer kudam aṭanga pekchhuah hun atan Thawhṭanni, Nilaini leh Zirtawpni-te ruat a ni.
▶ Leiṭha hi dealer kudamah ip khat (kg 45) chu Rs 500-a lei theih a ni.
▶ Lei hànna kum tina lo da ve zel avang leh duhkhawp leichi hmuh tur a awm loh avangin buh leh thlai chìn a hlawk lo zel.
▶ Champhai leilet hectare 593.36-a zauah pawh leichi duhkhawp hmuh loh chuan buh leh bal hlawk takin a thar chhuah theih tawh meuh loh.
▶ April 2023 thla bik atan Mizoram chuan sorkar laipui aṭangin BVFCL Company kaltlangin a man tlawm-in fertilizer metric ton 2,000 a dawng.