Chief Minister leh National Badminton Team Coach-in Mizorama badminton tihhmasawn dan tur sawi dun

Chief minister Zoramthanga leh National Badminton Team chief coach Pullela Gopichand chu nimin khan CMO-ah an inkawm a, Mizorama badminton tihhmasawn dan tur an sawidun.

Zoramthanga chuan badminton-ah Mizote'n theihna an neih thu a sawi a, "Training ṭha tak nen chuan khawvel pum huap pawha la inhlangchho thei tam tak an awm ngei ka ring. Heng potential-te hi haichhuaha tihchak chu sorkar pawhin a ngaihpawimawh a ni," a ti.

Gopichand chuan Mizoram badminton player-te chu talent nei ṭha a tih thu sawiin, Pullela Gopichand Badminton Academy (PGBA) technical partner a nihna - Mizoram Badminton Initiative hmalakna hnuaiah a thawh khatnaah Junior National Champion an awm der tawh thu a sawi a, "Hemi kal zelah hian PBGA chuan investment a pek zat chu belhchhahin, Mizoramah palyer 15 (kum 10 - 14) chu training ngawrh tak pek a tum," a ti a, training kalpui dan tur kimchang a sawipui nghal bawk.

National Badminton team Chief Coach hian Regional Development Centres (RDCs) tihchangtlun te, coach-te hmasawn belh zelna tura hmalak leh hmachhawp an neih dan te, Kotak CSR fund bultumin player naupang zawkten full-time scholarship an neih theih nan hmalak a nih thute a sawi a; Chief Minister hnenah hian High Altitude Training Centre siam a nih theih nan hmalakpui turin a ngen nghal.

Chief Minister chuan ruahmanna fel siam ni se, player-te hmasawn zel theihna turin sorkar pawhin a tih ve tur chinah theihtawp a lo chhuah tur thu a sawi a ni.