MNF aia hruaitu nei ṭha an awm lo - MNYF Vice President

MNF chuan nimin khan an pisa-ah chhung inkhawm an hmang a, he huna thusawitu Mizo National Youth Front (MNYF) vice president Zodinpuia chuan MNF aia hruaitu nei ṭha an awm loh thu a sawi.

MNYF Vice President chuan, India ramah hian party hrang hrang an awm khawm tih sawiin, "Hmalak dan pawh a in ang lo hlawm hle a, a ṭha ber tur MNF chuan mipui tan a ngaihtuah. Mizoram political party hrang hrang zingah MNF aia hruaitu nei ṭha kan awm lo a, Congress, ZPM leh BJP hotu lu te chu hun rei tak MNF-a lo awm tawh, nihna leh chanvo thlâkhlelh avanga political party hrang hranga awm kual tawhte an ni," a ti.

Mizoram chu Pathianin Zofate Jerusalem ni tura a din nia sawiin Zodinpuia chuan, "Zo hnahthlak rorelna pakhat hnuaia kan awm leh theihna atan hnama min dintu chuan kawng min ruahmansak mêk," a ti a, Zofate’n zalenna famkim an neih hma loh chuan MNF chu Mizo mipuite hruai tura Pathianin a pek niin a sawi.