Minister hoin railfed oil depot sawiho

Food and Civil Supplies & Consumer Affairs minister K Lalrinliana hoin nimin khan a pisaah Indian Oil Corporation Ltd (IOCL) leh sorkar hotute an inkawm a, Sihhmuia railfed oil depot din tur chungchang an sawiho.

Oil depot siamna tur atana ram lak turin a kaihhnawih tihfel ngaite sawiho a ni a, oil depot ram tura high tension line kalte sawn dan tur ruahmanna leh hmalak tawhnate Power Grid Corporation India Limited in report an pe a, PWD lamin a kalkawng tur zauh dan leh a kawng siam that dan tur ruahmanna awmte leh an hmalaknate an sawi bawk.

Geology & Mining lamin a hmun an survey na report pein, a ram leilung awm dan zirchianna leh a ngheh leh ngeh loh chungchangte an tarlang.

IOCL dy. general manager Deepak Kumar Pathak chuan ram lak tura tihfel ngai hmasate chungchangah Mizoram sorkar hmalakna a ṭhat thu leh a lawm thu a sawi a, ram lak fel thuai a nih theih nan IOCL hian Mizoram sorkar hnenah a rang lamin lekha an siam tur thu a sawi a ni.