International Biodiversity Day hman a ni

Nimin kha International Day for Biodiversity 2023 a ni a, Mizoram hmun hrang hrangah hman a ni. Aizawlah chuan Environment, Forest and Climate Change (EFCC) minister TJ Lalnuntluanga hoin IASE Auditorium, Republic Vengah hman a ni. Day thupui atan 'From Agreement to Action: Build Back Biodiversity' tih hman a ni.

TJ Lalnuntluanga chuan, International Biodiversity Day chu khawvel a hun pawimawh ber pawl a nih thu a sawi a, "Khawvel sik leh sa inthlak danglam chho zel leh nungchate dinhmun en hian a pawimawh hle. Khawvelah thiamna a sang chho zel a, amaherawhchu kan environment lah nasa takin a inthlak danglam a, hei vang hian hmasawnna leh environment humhalh hna hi insubuai loa a kalkawp theih nan thiamna sang tak bakah moral dik kan neih a pawimawh," a ti.

Mi ṭhenkhatin thil chhe lai ringawt an sawi ṭhin tih sawiin Minister chuan, "A ṭha lam zawng kan hmuh hmaih leh ṭhin hi a pawi. Kan rama thing leh mau leh nungchate enkawlna kawngah pawh Forest department leh environment pawl hrang hrangte'n chak taka hma lain, Biodiversity Board-te din a ni. Forest Act hrang hrang leh lui tui humhalh kawngah pawh dan mumal tak kan nei a, hemi kawnga hmasawnna pawh a kal chho zel a ni," a ti a, environment leh biodiversity enkawl hna chu sorkar, pawl leh mimal thawhhonaah a innghah thu a sawi.

Minister hian Biodiversity Day denchhena buatsaih painting leh quiz competition lawmman a sem a; painting competition-ah Lalchhanhimi Hnamte, Mount Carmel HSS chu pakhatna a ni a, quiz competition-ah Lalpekmawii Chawngthu leh C Vanlalremruati, MICE zirlaite chu pakhatna an ni.

He hunah hian Principal chief conservator of forest RK Singh, Mizoram state Biodiversity Board chairman ni bawk te, IASE principal Prof. Lallianzuali Fanai leh MZU Bio-technology department HoD Prof. John Thanzamaten thu an sawi bawk.

International Biodiversity Day pual hian Lungleiah chuan Baptist Higher Secondary School-ah nungcha leh ramngaw pawimawhna inzirtirna hun hman a ni a; Lunglei DFO PC Lalchhandama'n zirlaite chu nungchate pawimawhna leh inlaichinnate a hrilhfiah. He hunah hian zirlai leh zirtirtu 150 vel an tel a ni.