KHAWTHLIR

Padma Award

Republic Day, 2024 hian India ram khua leh tuite chawimawina sang ber, Padma Award hrang hrang – Padma Vibhushan, Padma Bhushan leh Padma Shri dawngtute hming puan a ni leh dawn. Award hi kawng hrang hranga hnathawk ṭha leh mi hmingṭhate tan dil theih niin, dil duh emaw, rawt duh nei emaw chuan September 15, 2023 aia tlai loah mahni awmna DC-te hnenah hriattir tur a ni a; awards.gov.in ah a dil theih bawk. Hrechiang duh tan padmaawards.gov.in ah en theih a ni.

Zodintluanga ruat

MPCC president Lalsawta chuan nimin khan MPCC treasurer aṭanga bang ta Zodintluanga Ralte, MLA chu MPCC general secretary atan a ruat. Zodintluanga rual hian ADCC president hlui Lalrobiaka pawh MPCC GS atan hian a ruat ve nghal a ni.

PC party-in an din

PC party office bearer-te chu nimin khan an president Vanlalruata hoin an pisa-ah an ṭhukhawm a, kumin inthlanpui lo awm tur atan nomination committee an din. PC President chuan, kumin MLA inthlan lo awm turah sorkarna siamtu zingah an telve ngei an inrin thu a sawi.

Bituk chin aia rit tlan phal lo

Lunglei DC Ramdinliani chuan Lunglei - Tlabung kawnga Phairuangkai leh Tuichawng lei (bridge) chu siamṭhat tura hmalak mek a nih thu leh dim thiam a ṭul thu a tarlang a; "Tun dinhmunah Phairuangkai lei hi ton 12 dawl zo tura ngaih a ni a, Tuichawng lei hi ton 15 dawl zo tura ngaih a ni bawk. Chuvangin, lirthei zawng zawngte, a bikin bungraw phurte'n leiin a dawl zawh chin bituk aia rit phur chungin heng leite hi an zawh tur a ni lo," a ti.

Remna Ni

Champhai bawrhsap James Lalrinchhana hoin nimin khan DC conference hall-ah June ni 30-a 'Remna Ni 2023' hman dan tur sawiho a ni. Remna Ni lawmna pual hian painting & photography competition, HS leh HSS zirlaite pualin quiz leh essay competition leh digital flyer leh video tawi insiamsiak huaihawt an rêl.

Manipur MLA-ten MPCC hruaitute an kawm

Manipur MLA pahnih LM Khaute leh Paolenlal Haokip-te chuan nimin khan MPCC president Lalsawta chenna inah MPCC OB-te an kawm.Manipur MLA-te chuan, Manipur-in buaina nasa tak a tawh mek chu national level-a hmalak ngai a nih thu sawiin, MPCC hruaitute chu hma laksak turin an ngen. MPCC hruaitute chuan Manipur buaina chu an ngaihven reng thu leh a theih anga hma an lo lak tawh dante sawiin, "Indian National Congress hotute hnenah na lehzuala hma la tura thlen kan tum," an ti a; he buaina hian Zofate inpumkhat lehzualna thlen se an duh thu an sawi.