CM-in Zemabawk playground lungphum phum; Playground siam hna NECS-in an thawk dawn

Chief minister Zoram­thanga, Aizawl East I bialtu chuan nimin khan a bial chhunga Aizawl Smart City Ltd. hnuaia Zemabawk Playground sakna tur lungphum a phum. Zemabawk Playground hi cheng vbc 25.66 senga siam tur a ni a, contractor chu M/S Northeast Consultancy Services (NECS) a ni.

Zoramthanga chuan, Zemabawk playground chu Aizawl hmar lama awmte tan infiamna hmun pawimawh tak a nih thu a sawi a, "Tun hma aṭangin a siamṭhatna tur ngaihtuah fo tawh a ni a, Smart City hnuaiah beisei phak aia ṭha tura hmalakna a awm ta hi a lawmawm hle," a ti a, thawktute'n ruahman anga ṭha taka an thawh ngei a beisei thu a sawi.

Sorkarin infiamna tihhmasawn nan hma a lak nasat thu sawiin Chief Minister chuan, "Infiamna hi taksa sawizawina satliah mai ni loin, eizawnna ṭha leh ngelnghet tak a ni thei tih infiammi hlawhtling tak takte aṭangin kan hmu. Sports hi industry a ni a, ṭhalai a tui mi leh talent neite'n chutiang kawnga an kal theih nan sorkar chuan sports infrastructure ṭha zawk din a, a bulṭhut (grassroot) aṭangin thuam ṭhain hma a la a ni," a ti.

Zoramthanga chuan hun khirh tak tak leh harsatnate awm ṭhin mah se, economy in chak zawka hma a sawnna tur kawng a inhawn zel a beisei thu leh hun khirhte chuan an daihrei ngai lo a, mi tumruhte'n an dairei zawk ṭhin thu a sawi bawk.

Aizawl mayor Lalrinenga Sailo pawhin thu sawiin, "Hetiang ro tling hmasawnna kan neihte leh din mekte hi mipui lamin hlut nachang kan hriat a, dimdawi leh hman ṭangkai kan tum a pawimawh. Mizoram chu chhe lailet der anga sawi awm ṭhin hi a pawi a, hmasawnna leh insiamṭhat ngaihna erawh chu awm tho mahse state pawn mite pawhin kan khawtlang nun leh inrelbawl danah entawntlak an rawn tih tam tak kan nei," a ti.

Lungphumna inkhawm hi UDPA secretary Lalmalsawma Pachuau in a kaihruai a; playground hi October 15, 2023 a zawh tura ruahman niin, tunah hian a laih hna thawh mek a ni tawh. He project-ah hian playground bakah, four wheeler 45 leh two wheeler 61 dah theihna tur te, gallery pahnih - mi 1,033 ṭhut lenna leh mi 758 ṭhut lenna tur leh ṭul dangte ruahman a ni.