Sorkar ṭha siam tur chuan a hmasa berah Pathian dah a ngai - Lalsawta

Mizoram tana mi ṭhahnem­ngaite'n Rampum Nehemia Chawnghei Ṭawngṭai Prog­ramme an buatsaih chu zawmve tura sawm an nih angin MPCC chuan nimin khan he hun pual hian Congress Bhavan-ah hun an hmang a, MPCC president Lalsawta chuan, sorkarna ṭha siam tur chuan a hmasa berah Pathian dah a ngaih thu a sawi.

MPCC President chuan Mizoram dinhmun hria a, mi ṭhahnem­ngaite'n Pathian lama ṭan a ṭulzia leh Pathian hnena an fel loh leh dik lohna te thupha chawia hun hman an huaihawt chu thil lawmawm leh ṭul tak a nih thu sawiin, "A taka danglamna thlen thei tura rilru leh thinlung taka Pathian lam hawi a ṭul," a ti.

Sorkar ṭha siam tur chuan Pathian a hmasa berah an dah zel a ṭul tih sawiin Lalsawta chuan, "Kan thil tih tehna hmanrua atan pawh 'Bible-in engtin nge a tih' tih a ni zel tur a ni. Pathian nen chuan ram rorelna ṭha Mizoram mipuite kan pe thei," a ti a, incheina atan leh vote zawnna atana Pathian hming lamtu chuan Pathian leh ram mipui pawi a sawi thu a sawi.

Chawhnu huna kaihruaitu MPCC vice president Lal Thanzara chuan, ṭawngṭai thil­tihtheihzia hre lo tan ringtu nih a famkim lo tih sawiin, "Kan rama buaina leh harsatna hrang hrang thlengte hi tihtakzeta ngaihdam dila Pathian hnena kan thlen chuan damna kan chang thei a ni. A lang a mawi ni lo a, ram leh hnam siamṭhat duhna tak tak nena ṭawngṭai fo a ṭul," a ti.