Martarte inpekna ropuizia leh hlutzia kan hre telh telh dawn - Tawnluia

Nimin khan Hnam Rûnah martar thlah inkhawm buatsaih a ni a, he huna thusawitu MNF sr. vice president Tawnluia chuan, martarte inpekna ropuizia leh hlutzia kan hre telh telh dawn niin a sawi.

MNF Sr. Vice President chuan Zofate inpumkhatna atan leh inzawmkhawmna atana min phuar khawmtu pawimawh tak chu martarte an nih thu sawiin, "Mizoram hi Zofa zawng zawngte tan inpuia pawm a nih theih nan martarten an thawhhlawk hle. Martarte inpekna ropuizia leh hlutzia hi kan hre telh telh dawn. An thihchhan kha kawhmawh bawl leh suahsual vang a ni lo a, ram leh hnam tana nunna hlutak hlan an ni. Chawimawi an phu em em a ni," a ti.

Ram leh hnam tana nunna lo hlan tute, fel taka chhinchhiah leh ngaihhlut a ṭul tihna avangin martarte thlanmual din a nih thu sawiin, "Martarte thlanmualah hian hnam tana nunna hlantu zawng zawngte dah vek kan duh. Chutih rualin, martar chhungte duhthlannaah kan dah a, inphum duhte chu kan buaipui zel a ni," a ti a, martarte thlanmual chu hmun hlu leh pawimawh a nih avangin Art & Culture dept. enkawl atan sorkarin a dah thu a sawi.

MNF Sr. Vice President chuan MNF party chu party dang ang an ni ve lo nia sawiin, "Mahni pumpui ṭanghma hai a, nihna um ṭhinte tana din a ni ve lo. Hnam tana thisen fartawp thlenga beitute awmna leh din chhuah a ni. MNF hi tumahin an dah hniam theih miah loh nachhan chu, hnam martarte thisenin a bual a ni. Martarte hi kan arsi lian an ni," a ti.

MNF thuchhuah tarlan danin, nimina martar an thlahliamte hi lt. corporal Tlankima, capt. Chhunhranga, Pachhunga leh Laihnuna an ni a, hmun hrang hranga an duty laia kahhlum an ni. An chhungte ngenna anga an ruhrote phawrh niin, martarte thlanmualah dah tur a ni.