Aizawl Smart City Project pahnih lungphum phum

Deputy chief minister Tawnluia chuan nimin zingah khan Aizawl Smart City Project hnuaia Chaltlang Sports Multipurpose Hall, DIET Complex leh Upgradation of Aizawl Tourism Centre, Tourist Lodge Chaltlang sakna tur lungphum a phum. Dy. CM chuan, project pahnih atan hian pawisa a awmsa thu a sawi.

Tawnluia chuan, project buatsaih kawngah hun rei tak mamawh a nih thu leh Covid-19 hripuiin a tlak buak avanga hna a chak theih loh thu a sawi a, "India ramah Smart City Project hi kum 2024 thleng pawhsei a ni a, hemi chhung hian project pahnih hi zawh tum a ni. Project pahnihte hi pawisa awmsa a nih avangin contractor-te'n ṭha leh fel fai taka an zawh theih nan bill chungchangah sorkar lam aṭangin buaina a awm lo ang," a ti a, contractor-te chu uluk tak leh ram tan ṭhahnemngai taka thawk turin duhsakna a hlan.

Chaltlang veng LC leh NGO phungbawm a ngaih changin lo mit meia, bengvar ṭhin tura mipuite sawmin Tawnluia chuan, "Tourist Lodge hi khualzin thlenna piah lamah Aizawl khawpuia pui pun theihna leh ṭangkai taka hman theih tura ruahmanna siam belh chu sorkar ngaih pawimawh a ni. Sports Multipurpose Hall dang ṭhalaite tana siam sak a ni thei tur hi ṭhalaite tan a lawmawm lehzual," a ti.

He hunah hian Aizawl mayor Lalrinliana Sailo, UDPA secretary Lalmalsawma Pachuau, chief executive officer CC Lalchhuangkima leh Chaltlang LC chiarman C Lalpiangtharaten thu an sawi bawk a ni.

Chaltlang Sports Multipurpose Hall hi cheng vbc 13.52 senga sak tur a ni a, contractor atan H Sanga, Vaivakawn Road, Chanmari, Aizawl thlan a ni. November 15, 2022 khan contract agreement siam a ni a; basketball court, table tennis, boxing ring, gym, parking leh dormitory-te a awm dawn a, four wheeler 10 leh two wheeler 64 dah theihna parking siam tura ruahman a ni.

Aizawl Tourism Centre Upgradation hi M/S Allied Concern, Dawrpuiin cheng vbc 18.11 sengin an thawk dawn a, February 10, 2023 khan contract agreement siam a ni. May 9, 2023 khan hna thawh ṭan niin, June 30, 2024-a sak zawh tura beisei a ni a; mi 400 len theihna tur auditorium, floor tinah lift well bakah toilet ṭha tawk tak leh roof plan atan Hybrid Solar panel siam a ni ang.