Tute tan pawh YMA chu a awm reng - Zodintluanga

Changpui branch YMA chuan nimin khan an khua-a Vanhnuailiana (Vanchaka) Runah an kum 50 (golden jubilee) tlin an lawm a, an hun hmanpuitu bialtu MLA Zodintluanga Ralte chuan YMA chu tute tan pawh a awm reng thu a sawi.

Zodintluanga chuan YMA hi awm lo se kan ram hi engtin nge a awm ang tih a ngaihtuah ṭhin thu sawiin, "YMA chu mi mangang leh harsa zawkte tanpuitu an ni. Kohhran leh political party a thliar hrang ve lo a, thlei bik nei ve lo. Mi tute tan pawh YMA hi a awm reng a ni," a ti.

Changpui ṭhalaite chu zirna uar a, mi tih ang an ti thei a ni tih hria a, ṭan la thar tura fuihin Zodintluanga chuan, YMA hruaitute pawh ṭhalaiten nun­kawng dik an zawh theih na tura nasa zawka ṭan la tur a chah.

Zodintluanga chuan, zu leh ruihhlo laka fihlim hi khawtlang hma­sawnna tura ke penna pawi­mawh ber a nih thu sawiin, Changpui ṭhalai leh khawtlang mipuite chu hemi kawng a nasa zawk a ṭan la turin a sawm.

Changpui khua hi Lunglei district-a awm a, in 98 vel niin, mihring 494 vel an awm.