Sorkarna kan chan leh ngei ka ring - MNYF President

Lengteng South Block MNF, South Zone chuan nimin khan Chhawrtui community hall-ah political training an buatsaih a, an hun hmanpuitu MNYF president Dr L Thangmawia, Lengteng bialtu MLA chuan MLA inthlan lo awm turah sorkarna an chan leh ngei a rin thu a sawi.

Dr L Thangmawia chuan bialtu MLA anga a thiltih fuh tawk lohnaah hriatthiamna dilin, "Kan ṭangrual leh ang a, kan thawhrim rah kan hmu leh dawn a ni. Pathian hian phal êm êm pahnih a nei a, pakhatna chu ama tâna thawh a ni, pahnihna chu midangte tâna thawh a ni. Chu vang chuan Pathian tân leh mipui leh ram tân kan thawh a ngai a ni," a ti.

Mi thar eng emaw zat an nei thei chu Pathian malsawmna a nih thu sawiin MNYF President chuan, 'MNF kan sorkar leh a nih pawhin ram tân enge ka thawh ve theih tih hre thar zel ila. Hun rei lote kan neih chhûng hian theihtawp chhuah ang u," a ti a, Pathianin term leh pawh MNF sorkar a pek leh ngei a rin tlat thu a sawi.

Dr L Thangmawia chuan a fel lohnate zawng zawng duh nise sawi tur tam tak a awm tur thu sawiin, "Amaherawhchu, in mi thlawpna avàngin lungrual taka thawk ho thei kan ni. Tun term chhungin harsatna kan tawk nasa êm êm a, Covid avànga harsatna te, Myanmar râltlan buaina te, Bangladesh râltlan a rawn ni leh. Chutah râltlan avànga buaina kan tawh zawng zawnga buaina râpthlâk ber Manipur aṭangin a rawn thleng veleh. Pathian rorel dan ngaihtuah chuan MNF sorkar kaltlanga Zofate rorelna pakhat hnuaia dah tih hi a rawn lang chiang a ni," a ti.