Zo Ri-mawi International din champha lawm

Zo Ri-mawi International Charity chuan nimin khan Chaltlang High School-ah an din champha lawmna leh charity awareness programme an buatsaih a, Social Welfare minister Lalrinawma'n a hmanpui. Minister chuan, " Mahni hlawkna um loa midangte tana inpe apiang an hlim a, an bula khawsak a nuam ṭhin," a ti.

Lalrinawma chuan, Mizote hi hmanlai aṭanga mite tana inpek ngaisang hnam, tlawmngaihna chawisangtu, ṭhian chhan thih ngam hial khawpa midang tana inpezo an nih thu a sawi a, "Tunlai khawvelah Mizote chu ringtu kan lo nih hnuin kan zui Isua inpekna entawn chung leh pi pu chena kan rohlu, midangte tana inpekna kan chhawm nung zel. Mahni hlawkna um loa midangte tana inpe apiang an hlim a, an bula khawsak a nuam ṭhin," a ti a; Zo Ri-mawi International-te hmalakna chuan a ṭha zawngin naupang eng emaw zat nun a khawih danglam tawh thu leh naupang dang tam tak tan malsawmna an la nih chhunzawm zel a beisei thu a sawi.

He hunah hian AMC corporator David Zohmangaiha, Zo Ri-mawi International Charity president Lalrozama Ralte leh vice president C Lurite pawhin thu an sawi.

Zo Ri-mawi International Charity hi naupang chanhai, ṭanpui ngaite tanpui tura pawl din a ni a, sikul kalna tur nei lo naupang 14 an enkawl mek. Naupang 14 zinga panga chuan HSLC an pass tawh a, an zinga pakhat chuan HSSLC a pass chhuak tawh a ni.